Nova: A Xunta optimiza a xestión documental coa eliminación de máis de 40.000 metros lineais de documentación desde 2016

O Goberno galego autorizou desde o ano 2016 máis de 40.000 metros lineais de documentación co fin de optimizar a xestión documental. Así se reflicte no informe sobre o impacto do Consello de Avaliación Documental de Galicia avaliado hoxe no Consello da Xunta e no que se dá conta do funcionamento desta ferramenta estratéxica para garantir unha correcta conservación, acceso e eliminación dos douscentos producidos polas administracións públicas galegas.

Así, este órgano colexiado da Consellería de Cultura, Lingua e Xuventude celebrou desde a súa creación, no ano 2016, máis de 20 sesións ordinarias nas que analizou 133 estudos de series documentais, elaborou 128 táboas de avaliación publicadas no Diario Oficial de Galicia e informou 152 solicitudes de eliminación documental.

Grazas a esta labor, autorizouse a eliminación de 349.422 unidades de instalación, o que representa máis de 40 quilómetros lineais de documentos sen valor conservados innecesariamente. Dese volume, 306.532 caixas corresponden á propia Administración autonómica, o que supón máis do 87% do total. Esta cifra tradúcese nunha redución significativa da carga documental, liberando espazo físico e optimizando recursos na Xunta de Galicia.

A actividade do Consello abrangue todo o sector público galego. Reúnese tres veces ao ano e recibe propostas non só das consellerías da Xunta, senón tamén de concellos, universidades e outras entidades públicas galegas. Ademais, este informe permite que cada consellería coñeza cales das súa series documentais foron avaliadas e cales non, incluíndo aquelas de carácter transversal que afectan ao conxunto da administración autonómica.

Máis alá da eliminación, o traballo do Consello de Avaliación Documental de Galicia determina os prazos de transferencia entre arquivos e establece os criterios obxectivos para conservar ou destruír documentos, segundo o seu valor legal, informativo, administrativo ou histórico. Tamén regula o acceso á documentación segundo a normativa sobre protección de datos, propiedade intelectual e outros dereitos.

Cabe destacar que a destrución documental só pode realizarse logo do ditame favorable do Consello e da resolución da Consellería de Cultura, Lingua e Xuventude. Ademais, este proceso faise baixo a supervisión dun técnico arquiveiro e cumpre cos estándares de confidencialidade, seguridade e sustentabilidade ambiental.

As tarefas deste organismo encádranse nos obxectivos do Plan de Arquivos da Xunta de Galicia 2022-2026, que aposta pola mellora continua da custodia documental e pola implantación de boas prácticas arquivísticas en todos os órganos da Administración autonómica. Con esta labor estratéxica, a Xunta reafirma o seu compromiso coa modernización da administración, a protección do patrimonio documental galego e a mellora do acceso da cidadanía á información pública.