Evento: Debuxantas

O Museo de Pontevedra reabrirá as súas portas prolongando as exposicións que estaban vixentes o pasado 12 de marzo cando a COVID-19 obrigou á clausura: ‘Leopoldo Nóvoa 1919-2019', e ‘Debuxantas. Pioneiras da ilustración', que non puidera ser nin inaugurada e apenas estivo unhas horas aberta ao público.

A institución museística, logo de semanas de trámites e superadas as complicacións iniciais, acordou cos propietarios e depositarios de todas as pezas a permanencia das dúas mostras en Pontevedra ata o 30 de agosto.

Segundo explica o director Xosé Manuel Rey, o Museo está prácticamente a punto para a reapertura, e levaraa adiante tan pronto como se autoricen as sucesivas fases da ‘desescalada', previsiblemente o vindeiro 25 deste mes. A volta realizarase co obxectivo principal de ofrecer unha boa experiencia de visita ás coleccións, e con todas as garantías sanitarias, controlando o aforo, realizando medición de temperatura a visitantes, así como cumprindo todos os protocolos de seguridade. Poranse en marcha, en función das necesidades e oportunidade, diferentes modelos de limitación do número de persoas nas instalacións, ben establecendo franxas de visita para diferentes grupos de poboación, ben coa organización de percorridos ‘con cita previa'.