Evento: Lume

Lume é a terceira produción da Cía. DuKtO, un espectáculo para todos os públicos cunha escenografía dinámica, onde as luces e sombras achegan novas dimensións que se combinan con texturas e cores.
O espectáculo presenta un mundo íntimo entre os catro intérpretes, ambientado nun espazo en branco que ben podería ser un barco ou un castelo de sabas de nenos.
Un conxunto heteroxéneo de teas crea un percorrido de entrada do público por dentro do espazo escénico, que pronto transformarase e adquirirá distintas conformacións durante o espectáculo, condicionando a visión do espectador.
Os catro personaxes transitan entre o mundo de fantasía e o terreal, representando conceptos antagónicos que optan por un acto de liberdade e coraxe de poñerse en xogo. Mediante unha linguaxe escénica que se nutre do circo e compleméntase co teatro e a danza, desenvólvense as diferentes escenas, maioritariamente dúos, onde aparecen as acrobacias, malabares e trapecio. As partes grupais destacan pola investigación na técnica dos portés acrobáticos e a súa integración co trapecio.