Evento: Arqueoloxía en Monodose

Nesta ocasión, dentro do ciclo "Arqueoloxía en monodose", que organiza o Museo, María Martín Seijo e Luis Cordeiro Maañón serán quen presenten "A neveira de Pardeconde (Xunqueira de Espadanedo) e a conservación dos bens de madeira".

Durante a intervención arqueolóxica na Casa da Neve de Campo Eirado, unha estrutura para conservar a neve durante os meses cálidos, localizáronse dúas pezas de madeira, preservadas por saturación de auga nos niveis de abandono. Este é un exemplo de que en determinadas condicións, nas neveiras, pozos ou  latrinas, pódense conservar este tipo de materiais, o que permite coñecer aspectos do traballo da madeira en época moderna, do que non hai moitas evidencias, así como aproximarnos ao traballo na neveira a través das ferramentas utilizadas nela.

María Martín Seijo é doutora en Arqueoloxía e Ciencias da Antigüidade pola USC. É científica titular del INCIPIT-CSIC.

Luis Cordeiro Maañón ten participado no estudo dos recintos circulares da Idade do Bronce en Galicia no marco do grupo de investigación Ecopast da USC; dende o ano 2003 ata o presente participou en intervencións arqueolóxicas de diversa índole. Na actualidade desenvolve a actividade profesional na empresa "Citania Arqueoloxía S.L.", coa cal se realizou esta intervención.

As conferencias terán lugar no Centro Cultural Marcos Valcárcel, rúa do Progreso, 30. Ourense