Evento: Charla "Presente e futuro da Atención Primaria”

A biblioteca cede o espazo para a charla Presente e futuro da Atención Primaria.

Nesta xornada organizada pola Asociación de Pacientes e Usuarios do CHUS, dous profesionais da Atención Primaria, os doutores Flora Miranda Pena e Joám Casas Rodrígues, van dar a súa visión da situación actual deste servizo. Son moitas as cuestións a abordar e ofrecerán a súa perspectiva sobre aspectos como a función e a finalidade da Atención Primaria; o exceso de pacientes asignados a cada profesional, que supera o fixado no plan de mellora; a redución do tempo dispoñible para cada persoa, etc.

A doutora Flora Miranda Pena é licenciada en Medicina e Cirurxía pola Universidade de Santiago de Compostela, especialista en Medicina Familiar e Comunitaria. É colaboradora docente desta disciplina na Facultade de Medicina, e titora de práctica clínica do alumnado de 5º curso e do MIR. Forma parte do Comité de Ética Asistencial da área sanitaria de Santiago -A Barbanza e dos grupos de Bioética e de Comunicación da Asociación Galega de Medicina Familiar e Comunitaria. Actualmente exerce como Médica de Atención Primaria no Centro de Saúde do Concello da Estrada.

O doutor Joám Casas Rodrígues é licenciado na Facultade de Medicina de Santiago de Compostela e especialista en Medicina de Familia e Comunitaria. Ten formación posgraduada en Bioética pola Universidade Complutense de Madrid. Foi membro do Comité Ético de Investigación Clínica de Galiza e foi Presidente do Comité de Ética Asistencial da área sanitaria de Santiago - A Barbanza. Actualmente exerce como Médico de familia no Centro de Saúde do Concello da Baña

No salón de actos. A entrada é libre ata completar a capacidade da sala.