Rede galega de teatros e auditorios

OH, MAMMI BLUE! comeza coas primeiras horas dun parto, as últimas dun embarazo e a sensación de que algo vai saír mal. 

A  través dunha serie de incidentes e erros cos que a protagonista se compromete ata o final, asistiremos a un desenlace inesperado que cambiará a súa vida e a dos que a rodean, para sempre.

A través dunha posta en escena innovadora e visualmente impactante, a peza achéganos un testemuño único e luminoso sobre a perda, o trauma, o amor e a supervivencia.

Nun mundo feito de libros, alguén ordena ringleiras perfectas nunha rutina acompasada, sen fendas. Un volume, outro, outro máis… Ata que un día, un libro cae e con el derrúbase a orde: comeza así unha viaxe inesperada guiada polo desexo de ver o mar.

Oh! é o novo espectáculo de AsSircópatas, unha peza de danza e circo para público familiar con música en directo. Un universo onde a escenografía se transforma e acompaña cada descubrimento. Unha viaxe sorprendente que nos lembra que, ás veces, abonda un pequeno xesto para que todo cambie.

Ficha artística

Cada verán, en Galicia, o lume regresa.
E despois do lume, que queda?

O que xermola no lume é unha peza de teatro físico e creación contemporánea que aborda os incendios forestais como ferida colectiva e como punto de transformación. A través do corpo, a luz e a música a obra propón unha viaxe escénica que transita da destrución ao renacer, da soidade á forza da comunidade.

O pai de Carmen Conde foi durante décadas especialista en dactiloscopia da Policía Xudicial. Un home que resolveu delitos e crimes descifrando a palma da man de quen os levaba a cabo. Como unha especie de nigromante, pero guiado pola ciencia. Como resultado, centos de atestados que dan conta da cartografía delictiva dunha Galicia delirante.

Tres historias acontecen na fraga.

"O Grúfalo" está baseado no texto do libro de Julia Donaldson e nas ilustracións de Axel Scheffer para o deseño dos monicreques.

Noa é unha nena duns oito anos que vive coa súa nai nunha casa apartada, sen irmás ou amigues con quen xogar. No seu arcón garda os xoguetes que xa non a entreteñen. Todo parece vello, inservible e apagado no seu mundo solitario. 

Un día, sen decatarse, activa unha sorte de encantamento e entra no mundo máxico que habita no arcón. Alí atopará seres diferentes que a farán descubrir mundos descoñecidos e fascinantes. Pero non todo é diversión dentro do arcón, tamén hai perigos agochados que Noa terá que sortear, coa axuda das súas novas compañeiras.

NORTEAR é unha peza escénica onde o real e o espectral, o político e o onírico, o etnográfico e o poético se entrelazan. Un grupo de mulleres habita un espazo despoboado do Norte, movéndose entre o traballo, a danza e a espera, nunha procura constante dun lugar onde ancorarse e seguir turrando pola utopía.

Ficha artística

Texto, dirección e espazo escénico: Helena Salgueiro

Intérpretes: Adriana Rodríguez, Alba López, Alixa Ladson, Masako Hattori, Helena Salgueiro

Banda sonora: Anne Lèpere

Espazo lumínico: Montse Piñeiro

Pódoche facer unha pregunta? Non me tes que responder se non queres: ti que idade tiñas cando soubeches que a xente podía morrer?

Ninguén tira fotos nos enterros conta a historia dun feito sorprendente: unha familia celebrou, no mesmo día, unha voda e un enterro. Esta autoficción vai recreando as fotografías que unha nena de 11 anos tirou ese propio día. Con tenrura, humor, participación do público e técnicas de fotografía en vivo, como a cianotipia, proponse unha reflexión colectiva sobre a morte dende a mirada da infancia.

TODOS OS PÚBLICOS

55 MINUTOS

NEURA é unha comedia que aborda o tema da saúde mental, iso si, con minúsculas. Os nosos protagonistas conviven  con teimas propias e alleas. Tentan agochar algunhas, exhiben outras orgullosos, en ocasións búscanlles tratamento, pero sempre sofren por elas.

Píscore Teatro ofrece a posibilidade de gozar, desde o teatro, da música da época barroca, nun proxecto teatral cómico, apartado do academicismo, que inundará todo o espectáculo.