Cultura no Camiño

Espectáculo de Maxia para público familiar, no que se poderán ver os Grandes Éxitos do Mago Romarís, números con cartas, con cordas, con laranxas e incluso con ¡Chourizos!

Maxia e diversión ao mesmo tempo

A noite pasada Xan revisou que fixera todas as tarefas: Limpou os dentes, fixo pis, puxo o pixama, .... e meteuse na cama. Pero do que non se deu conta Xan é de que non lle deu de comer ós animais da granxa. Á mañá seguinte cando o galo se ergueu para cantar como todas as mañás deuse conta de que tiña tanta fame que non podería contar. E todo o mundo sabe que se o galo non canta o sol non se levanta... e se o sol non se levanta Xan non espertará para darlles de almorzar ós animais. 

Xulia e Román acaban de coñecerse e o primeiro watsapp non tarda en chegar: Quedamos? Veña si! Pero cando?

O repertorio de contos deste espectáculo de narración oral é na súa totalidade contos tradicionais galegos, romances, cancións, brinquedos e xogos da nosa tradición. Unha viaxe pola Galicia máis máxica, chea de festas, romarías, tradicións que gardan con elas costumes e sentires dun pobo.

O obxectivo desta proposta é poñer en valor e achegarlles ás nenas e nenos o noso patrimonio cultural.

Enmaxiarte é un dos espectáculos revelación no mundo da maxia, da man do xoven Dani Polo, finalista do programa “Pura Magia” de TVE, chega un show completamente novidoso, con efectos máxicos realmente asombrosos e unha posta en escena de alto nivel.

Un espectáculo para toda a familia onde se mesturan diferentes elementos, maxia participativa, humor e ilusións de gran impacto!

Sen dúbida un plan perfecto para ilusionarse e viaxar polas diferentes ramas da arte da maxia.

DANI POLO

Premio Ali Bongo Francia 2018 a xoven mago revelación.

 Ano 1901, A Coruña. Dúas mulleres casan na Igrexa de San Xurxo, unha delas vestida de home. Unha historia de persecucións policiais, fuxidas en dilixencia, cambios de identidade e informacións manipuladas. As cómicas de A Panadaría presentan unha reconstrución irreverente dun suceso real. Unha comedia musical onde o verídico parece invento. Elisa e Marcela é unha historia de amor a contratempo.

Coprodución da Panadaría co Centro Dramático Galego, a Deputación de A Coruña, Concello de Vimianzo e o Concello de Rianxo.

O Alemán é unha peza, con vocación experimental, escrita, dirixida e interpretada por Diego Anido, que orbita sobre a idea do Sacrificio a través do absurdo cotián.

Durante os 50 minutos que dura da peza mergullámonos na rutina angosta dun personaxe a partir dunha linguaxe que se nutre dunha formación multidisciplinar en artes escénicas.

No Alemán Diego Anido parte da data de caducidade dun Yogurt para mostrarnos unha realidade deformada onde este dato aparentemente intranscendente convértese no escollo desencadenamento da acción.

Dirixido a nenos e nenas , mozas e mozos, maiores e moi maiores que queiran gozar dos bonecos e coñecer  a rica tradición do monicreque de cachiporra da Península chega esta nova versión do personaxe galego Barriga Verde. 

Xoán Curiel e A Banda do Verán presentan o seu traballo a trío. Un espectáculo moi completo con danza, música en directo e elementos de teatro que se caracteriza por facilitar a participación activa e constante do público asistente e por contar cuns artistas de sobrada experiencia en proxectos infantís e xuvenís.

Voz, guitarra, ukelele, percusión e unha bailarina que nos traen cancións moi divertidas e tamén entrañables; unha viaxe musical dende que soa derradeiro timbre do cole en Xuño ata o primeiro de Setembro. 

Ser diferente aos demais non debe avergoñar a ninguén, o importante é cómo xestionar esas diferenzas para afrontar o futuro. En CUACAC!, atopámonos cun personaxe torpe e caótico que amósa mediante as técnicas do slapstik (golpes, caidas, acrobacia excéntrica...), a manipulación de obxectos e a acrobacia aérea, un personaxe con grandes dificultades para facer o que se espera del. No desenvolvemento da peza navegará xunto cos espectadores por un mar de emocións soltando amarras onde as suas debilidades se transforman nas suas fortalezas.