Teatro

Dentro do programa de artes escénicas para escolares de Afundación, OnStage Company presenta a obra de teatro Unboxing Alice.

Hai moito tempo que Alicia visitou Wonderland por última vez. Chegou o momento de actualizarse. Tweedle Dee e Twee Dum suben ao coche dos youtubers e serán os encargados de guiarnos a través dunha hilarante viaxe para dar a coñecer a verdadeira natureza de Alicia. Todo un "video de desbloqueo". Esta obra baséase na participación do público, unha experiencia práctica e divertida para asimilar novos coñecementos e aprender a expresarse en inglés.

Dentro do programa de artes escénicas para escolares de Afundación, OnStage Company presenta a obra de teatro de actor “Class of Vampires”.

É un día moi importante para os nosos protagonistas! Comeza a rodaxe da súa primeira película, mais non vai ser doado… por un erro na asignación de tarefas veranse na obriga de improvisaren un creativo e innovador xeito de facer cinema!

Unha versión auténtica, extravagante e divertida do clásico de Bram Stoker, unida a Turner, Buffy e Crepúsculo, coa que te desangrarás… da risa!

Esta obra de teatro actoral cóntanos unha fermosa historia sobre a amizade, a constancia e a poesía, que nos arrodean nas cousas máis pequenas. Fala da necesidade de prestar atención aos pequenos detalles, eses que fan os días grandes. Rubicundo fala da perseveranza, ilusión e o traballo como camiño á posibilidade de perseguir os nosos soños sen sentir límites nin distancias…Tres personaxes interactúan con obxectos, monicreques, bailan e cantan en directo.

O Señor Hoppy, un home algo maior, moi tímido e amante das plantas está profundamente namorado en segredo da súa veciña, a Señora Silver, unha muller que vive acompañada da súa TARTARUGA Alfie. A Señora Silver, está preocupada porque Alfie non aumenta de peso e crece moi amodiño…O Señor Hoppy verá niso a posibilidade de gañar o seu corazón.

A grande traxedia celta de William Shakespeare protagonizada polos actores Xoán Carlos Mejuto, Luis Iglesia, Iria Ares, Carlos Sante e David Perdomo.

Unha viaxe á chaira escocesa, neboenta e insegura. Tambores de guerra. Berros de barro. Versos de sangue, traizón e morte. Feiticeiras retranqueiras e ministras do fado, manipuladoras dos máis bravos guerreiros. Un tempo eterno e circular do que ninguén volta xamais.

Voltan os tempos escuros. Voltan os tempos de Macbeth.

Virginia Woolf fai un percorrido de 24 horas na vida de Clarissa Dalloway, desde que se ergue pola mañá e comeza a preparar unha festa para o seu marido, ata o momento desa festa, pola noite. Un percorrido marcado polas horas que toca a campá do reloxo do Big Ben, polo tempo que vai pasando e que leva a Clarissa a ir atrás e adiante no tempo da súa vida. O fluxo da súa conciencia, a conciencia sobre a súa vida, as súas decisións, chega no mesmo instante en que abre a fiestra dese marabilloso día de primavera no que prepara unha gran festa.

En Hamlet, a trama trasládase á modernidade, facendo unha analoxía entre o outrora Reino de Dinamarca, onde ten lugar a peza orixinal, e unha empresa multinacional dos tempos actuais. Aínda que o tempo –cronolóxico enténdese– transcorrese entre unha peza e outra, as temáticas abordadas permanecen iguais. Fálase de traizón, abuso e xogos de poder, de acoso, da procura voraz e sen escrúpulos do lucro e da inafectividade. A ausencia de contacto entre o elenco ao longo da peza, por exemplo, reflicte unha sociedade autista e deshumanizada.

Todo indica que o futuro da lingua galega é incerto. Malia os niveis de protección legal do idioma, e case dous séculos de rexurdimento civil e literario, o descenso de falantes é evidente, con grande incidencia nas novas xeracións de galegas e galegos. Pero alén e aquén das análises socio-lingüísticas, a lingua segue viva e reclama o seu lugar natural nas nosas vidas. Atravesada por conflitos de longa data e certamente mareada polos avatares da política, a lingua espera sempre por nós nalgún punto do camiño.

A última creación de Matarile Teatro dirixida por Ana Vallés apóiase nun equipo de 14 persoas, nove delas intérpretes. En 2018/19 o Azkuna Zentroa e o Centro de Danza de Zaragoza organizaron dúas audicións onde se presentaron 150 candidatos, dos cales dous foron seleccionados para incorporarse ao proxecto Daimon.

Un personaxe obsesivo, cuadriculado e meticuloso.

Un ser único na súa especie rodeado dun sen fin de caixas que escapan ao seu control e coas que xoga para dar forma ao seu mundo.

Do caos xorde un universo delirante onde inventa a risa, creando unha tolemia cómica e transformándose nun novo ser cunha nova figura.