Teatro

Culturactiva SCG presenta Sénior, un espectáculo cómico sobre a crise dos 50.

Cos coñecidos e populares actores Luís Iglesia e Marcos Orsi como protagonistas, e dirixida por Avelino González, trátase dunha reflexión en clave de humor sobre a chegada ás portas da terceira idade. Cando se abandona a madurez e se comeza a ser sénior? Estamos realmente aviad@s para os retos e problemas que se nos botan enriba ao cumprir o medio século? E, sobre todo, estamos preparad@s para ser vell@s?

Elucubración teatral sobre a figura de Eduardo Pondal e a súa obsesión coa obra que ocupou toda a súa vida como escritor: Os Eoas.

A cabalo entre a realidade ficcionada e a fabulación dramática, o bardo bergantiñán, xa octoxenario e consumido pola neurose dos seus últimos anos, confronta as súas dúbidas, medos e insatisfaccións creativas, tendo por interlocutores un personaxe nacido da súa perturbación e a criada nova da pensión na que está albergado.

As melodías máis representativas do Teatro Lírico español  nas voces dun elenco de solistas da Compañía Lírica de Galicia baixo o título Tardes de Zarzuela forman unha montaxe que transita entre o sublime e o máis popular nun repertorio cuidadosamente seleccionado para ofrecer un espectáculo de calidade e á altura do público máis esixente.

Presentamos neste programa o repertorio operístico para soprano máis emblemático. Dúas sopranos profesionais abordarán un programa de gran repertorio, incluíndo obras dos autores máis recoñecidos e mundialmente vixentes e demandados, como Mozart, Verdi, Puccini, Leoncavallo, Bellini, etc en obras tan emblemáticas y coñecidas como Madama Butterfly, As Vodas de Fígaro, Turandot, Norma, Tosca, Carmen, Lakmé entre outras.

Que pasa con todos eses zapatos que xa ninguén usa? Todos os dias chegan a un recuncho dun agochado xardín fantásticas historias, as vivencias que traen consigo unha morea de zapatos de todos os tamaños e cores. Unha rapaza é a encargada de coidalos, de lles dar a benvida ao lugar onde vivirán para sempre, un lugar onde compartir emocións coas belas bailarinas, con Pechecho e os seus irmáns, cos namorados, co Sol e a Nube, e con centos de compañeiros que teñen moito que contarnos. Zapatos narra todas as historias que levan dentro os zapatos que xa non teñen dono.

Esta é a viaxe iniciática dunha cabra chamada Nina.
Chegada ao mundo nunha illa esquecida no medio do mar, un bo día decide marchar na procura dunha vida máis próspera e amable.
Nina é así, independente, inconformista e impaciente.
Tamén é descarada, sorprendente, fresca, fogosa, temeraria, insolente e insolvente per se.
Non acerta a comprender o xeito en que se relacionan e desenvolven os seus novos veciños de dúas patas.

  Elenco: Lines González e Lara Manzano

  Así é como transcorre un día na vida dun can, pero non dun can calquera. Trátase dun can moi especial que pertence a esa raza mítica, lendaria e con máis prestixio de todas, a de Palleiro.

   Este can é Duncan de Palleiro, o príncipe das corredoiras.

   Duncan leva unha vida sinxela ao carón do seu amo Aurelio e dos seus amigos, veciñas de sempre, nunha vila pequeniña e fermosa no medio das montañas chamada Óubidos, da cal se sente moi fachendoso.

Como serían os tres porquiños e o lobo feroz hoxe en día? Onde poderían atopar un lugar seguro e limpo, lonxe das grandes fábricas, no que poder construír as súas casiñas? Que ritmos musicais empregarían para se presentar?

A resposta a todos estes interrogantes, como todo, está nos libros, e tamén na moderna historia que vai construíndo un explorador afeccionado aos contos que percorre o bosque na procura dos seus personaxes favoritos. Adiviñades cales son?

Carapuchiña é unha nena duns 9 anos. Certo día, a súa nai encárgalle ir á casa da súa avoa para levarlle unha cesta con froita, un tarro de mel e unha botella de viño doce. Na súa viaxe atoparase con un leñador, unhas árbores bailarinas e cun lobo... que fará das súas para intentar papala.

Toda a historia está narrada por Prácido, un escritor de contos que, axudado pola súa vella máquina de escribir traballará arreo para escribir o conto máis bonito do mundo: Carapuchiña Vermella.

Monólogo cómico onde se analiza a vida dos galegos, en canto á súa cultura, o seu idioma, as súas expresións e a familia. Abórdase o carácter morriñento das galegas e galegos, a través das súas expresións, do seu humor, das súas costumes, das súas festas, etc.

Desde o “guapo, guapo non é, pero ten un pelaso”, ata o “ghastas pista", pasando polas manías dos pais e as obsesións das avoas, ata chegar aos chistes mais galegos.