Proxección audiovisual

Addi, un neno criado por unha nai clarividente, decide acoller no seu grupo de inadaptados a un rapaz que está a ser acosado. Deixados á súa sorte, os nenos exploran a agresión e a violencia, pero tamén aprenden sobre a lealdade e o amor. A medida que o comportamento do grupo avanza cara a situacións que ameazan a vida, Addi comeza a experimentar unha serie de visións oníricas. Poderá guialo a súa nova intuición de regreso a un camiño máis seguro, ou o avance cara a unha maior violencia será irrevogable?

Joe Gideon (Roy Scheider) é un implacable coreógrafo neste musical pouco convencional que retrata a dureza, o esplendor e a decadencia das xentes do mundo do espectáculo, a quen o triunfo lles nega ás veces a posibilidade doutros afectos. Un drama que retrata a outra cara do show, a do que acontece entre bastidores.

Cando a súa irmá Zara sofre un ataque de nervios, a introvertida Eva vese obrigada a aceptar o traballo de Zara como artista de Foley, e crear sons para un anuncio publicitario protagonizado por un cabalo. Cando unha cola de cabalo comeza a medrar a partir do seu corpo, Eva utiliza ese feito excepcional para iniciar un xogo de submisión cun mozo botánico. Unha das grandes sensacións da pasada edición do festival de Locarno.

Durante a Guerra Civil española e a Segunda Guerra Mundial, 3000 persoas deron fuxido da persecución dos nazis en España e Francia grazas a unha complexa rede que aseguraba un salvoconduto. Esa rede era o Equipo Ponzán, liderado por Francisco Ponzán, que xunto con 30 compañeiros, guías de montaña, falsificadores e coidadores de casas seguras, a través dunha Europa convulsionada, logrou facer un concienciudo traballo de rescate humanitario a ambas as dúas beiras da fronteira española.

Durante a Segunda Guerra Mundial tres soldados fixeron unha promesa: atoparse nun lugar concreto dez anos despois de rematar a guerra. Os tres cumpren a promesa, pero ao se xuntaren decátanse de que xa non teñen nada en común.

Verán de 1900, Suíza. A morte de súpeto da súa irmá máis vella obriga a Elisabeth a regresar á casa. Asfixiada polas estritas normas da vila, Elisabeth verase pouco a pouco forzada a rebelarse polo dereito a vivir a súa vida.

Bastien, un adolescente parisiense, pasa as vacacións coa súa familia nunha cabana á beira dun lago de Quebec. Alí atoparase con Chloé, unha moza maior ca el da que namora fondamente. Malia a diferenza de idade e os medos de Bastien, desenvolven un vínculo especial. Bastien terase que enfrontar aos seus medos para lograr un lugar no corazón de Chloé, mentres exploran a súa sexualidade e a inquietante lenda da pantasma do lago.

Documental sobre o filme de 1992 Orquesta Club Virginia, protagonizado por un elenco abraiante, con Jorge Sanz, Antonio Resines, Santiago Ramos, Enrique San Francisco, Juan Echanove, Manuel Iborra constrúe unha crónica agridoce do que foi unha rodaxe repleta de problemas de todo tipo, persoais e mais cinematográficos, pero que tamén é un canto de amor ao cinema. Un retrato do fracaso dun director superado pola película e da inquebrantable amizade que se forxou entre os seus protagonistas.

Eva non atura que a súa nai queira reformar a casa e desfacerse do gato, que, desorientado desde o divorcio, ouriña por todas partes. Quere marchar e vivir co pai, que, desorientado tamén coma o gato, está a vivir unha segunda adolescencia. Eva segue sen rumbo o seu pai mentres tenta reconectar co seu desexo de se converter en artista e volver atopar o amor. Mais, como alguén que cruza un océano de adultos sen saber nadar, Eva tamén descubrirá a carraxe que a corroe, e que, sen sabelo, herdou del.

Ferrín arraiano

Xosé Luís Méndez Ferrín e Aser Álvarez, o director desta curtametraxe documental, coñecéronse persoalmente en Vilanova dos Infantes, Ourense, na casa familiar do autor, hai máis de vinte anos. Alí forxouse unha fonda amizade que perdura no tempo e que mesmo é o punto de partida desta peza audiovisual, na que Ferrín fala sobre a súa vida, a súa obra e tamén sobre as cousas que máis lle interesan.

Florencio Delgado Gurriarán do A ao Z