Esta mostra reúne pequenas obras inéditas sobre papel, pequenos obxectos e esculturas ou fotografías, creadas por vinte artistas nas súas propias casas, traballos que nacen nun momento histórico singular e que, con prezos simbólicos, quere estimular o consumo de arte de proximidade e contribuír a suavizar a desescalada dos nosos creadores.
Francesc Torres (Barcelona, 1948) é amplamente recoñecido como un dos referentes históricos da instalación multimedia, membro da primeira xeración de instaladores xurdida no contexto artístico norteamericano na primeira metade dos anos setenta. A súa experiencia vital e artística levoulle vivir dacabalo entre Barcelona e Nova York, e no últimos vinte anos estableceu un forte vínculo con Galicia, pasando varias tempadas na Costa da Morte.
O Concello de Santiago e a Fundación Eugenio Granell acollen, na sede desta última, as obras do Legado Maside, adquiridas polo Consorcio de Santiago e a Deputación da Coruña, coa mostra ?Carlos Maside. [Patrimonio de Galicia]?. A exposición contará con documentación e libros da Biblioteca Granell relacionados co artista e poderase visitar na Sala Philip West, na primeira planta do museo.
Ata finais de outubro, o Museo das Peregrinacións e de Santiago acolle a exposición "Viae ad limina Sancti Iacobi" do debuxante e calígrafo lucense Chencho Pardo Valdés. Unha mostra composta por 42 debuxos e dúas cartografías nos que cobran protagonismo abondosas cidades, vilas e lugares do país vinculados coas rutas xacobeas.
As exposicións que estaban vixentes no Museo de Pontevedra o pasado 12 de marzo, cando a Covid-19 obrigou ao seu peche, seguirán sendo protagonistas na reapertura.
Trátase das mostras 'Leopoldo Nóvoa 1919-2019', e 'Debuxantas. Pioneiras da ilustración', que apenas estivo unhas horas aberta ao público.
Agora, tras semanas de trámites, acordouse cos propietarios e depositarios de todas as pezas a permanencia das dúas exposicións en Pontevedra ata o 30 de agosto.
Dunha forma sinxela e didáctica, explicamos a través de oito paneis os aspectos básicos da elaboración do tecido na antigüidade. Como fío condutor de todo o proceso servímonos das numerosas pezas recuperadas durante o case medio século de escavacións no castro de Viladonga. Entre todos eses fondos destacamos o peite, a tesoira, as pesas de tear, ou as máis de catrocentas fusaiolas que nos falan da importancia das labores do tecido para os habitantes do castro.
Mostra cunha selección de libros curiosos sobre o Camiño de Santiago como o que relaciona o Camiño co Dereito, un exemplar con encadernación tipo caderno de campo que analiza as Fontes do Xacobeo celebrado en Ourense.
27 exemplares coidadosamente escollidos que farán as delicias dos curiosos que decidan achegarse á biblioteca. A mostra pode visitarse no segundo andar.
O Museo Centro Gaiás exhibe ata o 10 de xaneiro de 2021 "Cinema e emocións. Unha viaxe á infancia", unha exposición organizada por La Cinémathèque française e a Fundación "La Caixa", en colaboración coa Xunta de Galicia no marco do Xacobeo 2021. A mostra convida a un percorrido a través dun século de historia do cinema e a unha reflexión sobre o papel fundamental da infancia na creación de relatos e personaxes no cine, así como sobre a influencia que ten a sétima arte no propio desenvolvemento persoal durante a nenez.
'Facer camiño' é unha exposición itinerante na que se asocia a arte co Camiño de Santiago que percorrerá as 7 grandes cidades galegas, así como as vilas de Tui, Cee e Mondoñedo, concellos asociados ao territorio histórico das rutas xacobeas.
A comisaria da mostra, Asunta Rodríguez, realizou unha escolma de 23 pezas que inclúen pinturas, esculturas e fotografías de destacados artistas galegos, enfiada por citas e referencias a Santiago de Compostela e á peregrinación xacobea de autores como Dante, Federico García Lorca ou Vicente Risco.
“Xenio, gloria e oficio” é a mostra coa que a Xunta de Galicia, en colaboración co Colexio Oficial de Arquitectos de Galicia, pon en valor a figura do arquitecto Domingo de Andrade. Trátase dunha exposición itinerante que divulgará o legado do mestre barrco na capital galega así como en Tui, Ourense e Lugo.
A importancia da mestría e oficio deste xenio da arquitectura barroca propiciou que a Real Academia Galega decidira dedicar o Día das Artes Galegas deste ano á difusión da súa figura e traxectoria artística.
