Contacontos/Narración oral

“O Grúfalo”, baseado no clásico de Julia Donaldson, conta como un pequeno rato utiliza a intelixencia e a imaxinación para escapar dos perigos do bosque. “Shhh! Temos un plan”, inspirado no libro de Chris Haughton, fala da amizade, da liberdade e dos plans que non sempre saen como esperamos. Completa a sesión “Na fraga”, unha proposta creada a partir da tradición oral galega, chea de animais, árbores e sorpresas.

Idade: de 4 a 12 anos.

Duración: 45 minutos.

Inscrición previa na biblioteca ou no teléfono 886 120 445 dende o 15 de xuño.

Corochas é un espectáculo de pequeno formato dirixido á primeira infancia (0-3 anos), que combina a narración oral, a manipulación de obxectos e a música. A través do conto acumulativo, da canción e xogo de imitación viaxaremos por diversas paisaxes e coñeceremos personaxes estrafalarias que deben resolver múltiples enredos.

Por que será que existen tantos xeitos de chamarlles ás corochas? Pode ser que a sensación para cada unha de nós é tan diferente que non somos quen de lles poñer un nome só? Ou será que as corochas só existen á beira do mar e as cóxegas no alto da montaña…

Fantásticas historias contadas por especialistas en Lingua de Signos da Federación de Asociacións de Persoas Xordas de Galicia (FAXPG).

Lugar: bebeteca

Entrada libre ata completar a capacidade da sala.

No marco do Festival Internacional de Narración Oral Atlántica Miúdo estará con nós a contacontos Chus Álvarez co seu espectáculo Ollo, piollo!.

Unha sesión de contos para ver, contar e cantar. Unha viaxe para camiñar xuntas, de conto en conto, xogando ao vexo, vexo entre imaxes e palabras.

No salón de actos. Para nenas e nenos de 3 a 8 anos. A entrada é libre ata completar a capacidade da sala.

Divertida sesión de contos na que se integran cancións, literatura infantil, expresión dramática e tradición oral. Os cativos poderán chuchar contos, canción e arrolos ata encher a barriguiña nesta proposta para gozar en familia.
Un fermoso xeito de coñecer e valorar a literatura infantil dende os primeiros anos de vida.

Data e hora: venres 5 de xuño ás 17.00 h.

Público destinatario: bebés (de 0 a 3 anos) acompañados de ata dous adultos

Inscrición previa na web da biblioteca  a partir do 27 de maio ás 09.00 h.

Esta é unha proposta artística e participativa de Polo Correo do Vento para FalaRedes. Inclúe narración, música e ilustración en directo para achegarlle á cativada a figura de Begoña Caamaño, a quen este ano se lle dedica o Día das Letras Galegas.

Con motivo do Día das Letras Galegas, dedicado por terceiro ano consecutivo a unha muller, achegámonos á figura de Begoña Caamaño, autora comprometida coa defensa do papel da muller na sociedade e coa necesidade dunha mirada feminista sobre os relatos tradicionais.

O espectáculo “Eu tampouco navegar” revisita mitos clásicos, a mitoloxía grega e o ciclo artúrico desde unha perspectiva actual, crítica e chea de humor. A través da narración e da reflexión, propón pensar sobre a liberdade das mulleres para decidir e actuar por si mesmas.

Ás veces a rabia, a mágoa ou a dor son tan fortes que sentimos que imos estoupar. Cando iso pasa, o monstro das emocións toma o mando. E se aprendemos a adestralo?

Acompañamos a Sara Cruz nesta viaxe para aprender a convivir coas nosas emocións. Unha sesión chea de aprendizaxe e sensibilidade para as máis pequenas e pequenos.

No salón de actos. Para nenas e nenos de 3 a 8 anos. A entrada é libre ata completar a capacidade da sala.

O cordel é unha das formas máis antigas de narración e entretemento, presente en culturas de todo o mundo.

Nestas deliciosas historias, un simple cordel se deliza entre os dedos e adopta, como por encantamento, as distintas figuras que acompañan a narración. Contos que deleitan.

No salón de actos. Para nenas e nenos de 3 a 8 anos. Entrada libre ata completar a capacidade da sala.

Do 25 ao 27 de setembro, o Centro Comercial Área Central acolle a segunda edición de Dálle Xogo, un festival de lecer familiar único en Galicia pensado para compartir tempo de calidade xogando e aprendendo en familia.
Durante tres días, o xogo converterase no gran protagonista cunha programación chea de xogos de mesa, demostracións, torneos, presentacións, obradoiros, charlas e experiencias educativas deseñadas para fomentar a conexión, a creatividade e a diversión sen pantallas.