Contacontos/Narración oral

Nace nos petróglifos o arco da vella? Probablemente.
Indican os petróglifos onde se agochan tesouros? Seguro que si.
E sobre todo: Gardan os petróglifos historias do pasado? 

Si, miles de historias. Moitas delas chegaron aos nosos días. O tempo foinas variando; quitando e engadindo acontecementos, crenzas ou costumes segundo as épocas. A algunhas chegoulles o momento de ser contadas de novo.

Mouras coidadoras da natureza que, ao contrario do que ás veces se dixo delas, son solidarias cos homes e só buscan a igualdade entre mulleres e homes.

As historias que máis emocionan a Cris de Caldas falan de mulleres que non viviron unha vida de conto pero que, sen dúbida, merecen ser lembradas. Recompilou historias de vida e contos de tradición oral e literaria onde as mulleres demostran ser as protagonistas das súas vidas incluso cando a morte ande preto. Fíxoo para poder contalas e para ser o altavoz de quen non puido alzar a voz: unha morea de heroínas anónimas que tiveron que camiñar por congostras cheas de obstáculos e sombras.

Un barrendeiro (ou como el prefire que lle digan mozo da limpeza) que pasa polo escenario aproveita que o espectáculo aínda non vai comezar para esixir que se deixe de tirar cousas ao chan. Está farto de recoller chicles, papeis, pano dos mocos e avoas en bo estado de uso. Farto de que ninguén recicle o lixo. Farto de pisar cacas de can!

A partir deste comezo un pouco excéntrico o seu discorrer escénico irá virando cara un tono máis amable dende o que a través de contos, dinámicas e cantigas, sensibilizar en contidos relativos ao coidado ambiental.

A través da historia de varias mulleres coñeceremos as pequenas revoltas que se deron nas súas vidas e que cambiaron o camiño das donas nas aldeas, e prepararon o camiño para o futuro, para nós. Historias duras e bonitas, cheas de humor e retranca que nos deixan con gana de seguir dando a batalla.

Das caixas máxicas dos contos saen carapuchiñas que non saben o seu conto, dragóns que parecen galos de curral, traballadoras en folga, princesas de pernas tortas e un neno que chora e provoca unha revolución. Precisamos un mundo que siga a ser azul pero cunha visión lila. Un mundo mellor, máis igualitario e xusto. Con princesas valentes, nenos con dereito a chorar e mulleres donas das súas decisións.

Que pasa cando xuntas ilustración e palabra escrita?... que xorden os grandes álbums ilustrados.

Que pasa cando xuntas ilustración e palabra contada?... pois que xorde Contos debuxados, debuxos contados.

Contos arredor do lume é unha compilación de contos, cantos e imaxes evocadas pola xograresa Alba de Vales. Achéganos o lume nas súas distintas formas e virtudes. A través dos contos e historias, fálanos de solidariedade, agarimo, comunidade e coraxe, que precisamos para andar o noso camiño propio. Alumeando co candil que prende a nosa chama interna, e que este espectáculo nos quere avivar.

Espectáculo de  contacontos con maxia, monicreques, diversión e moito máis.

Onde os libros, as histoiras e os animais -e que animais!- son protagonistas.

De todos os espectáculos de contos que Caxoto nos trae este é o que mellor se adapta a espazos exteriores (prazas, parques, campeiros, ...) Nel un barrendeiro fai unha entrada inesperada e ante un público expectante decídese a contar algún dos contos que le mentres limpa nas bibliotecas e os colexios municipais. Algunhas veces contos de medo, outras contos cheos de fantasía, contos tradicionais, ... todo mesturado con xogos, cantigas, ... un plan perfecto para escoitar sentados co cu no chan e os pés coma os indios.

A avoa de Marita sempre dicía que tardara en falar… pero que, cando arrincou, o que lles preocupa é que non dera calado… sobre todo porque contaba moitas das cousas que escoitaba! Pero é que, claro, hai cousas que merecen ser contadas: ben porque os presenciou en directo ou ben porque llas confiaron os protagonistas. Así nacen os contos e as contadas. Neste caso, unha e pequena, coma ela. Historias propias e alleas, contadas con moito ritmo, retranca e humor fresco.