Evento: Conferencia sobre Concepción Arenal no Circo de Artesáns
Conferencia sobre Concepción Arenal no Circo de Artesáns
“O PENSAMENTO FEMINISTA E SOCIAL DE CONCEPCIÓN ARENAL”
Conferencia de MARÍA XOSÉ PORTEIRO GARCÍA , xornalista e escritora.
DÍA: 6 de abril de 2022 (mércores/cuarta-feira)
HORA: 19:30 horas
LOCAL: Reunión Recreativa e Instructiva de Artesanos (“Circo de Artesáns”)
Rúa Santo André, número 36 – CORUÑA
(O acto estará presidido polo magnífico busto de Concepción Arenal realizado polo escultor Eugenio Duque y Duque (1835-1910) e que é propiedade do Circo de Artesáns.)
ACTO PÚBLICO, ABERTO A TODA A CIDADANÍA
É OBRIGATORIO O USO DUNHA MÁSCARA DURANTE O ACTO
PARA RESERVAR CHAMAR AO TELÉFONO DO CIRCO DE ARTESÁNS: 981-222976
________________________________________________________________
RESEÑA DA CONFERENCIA:
Concepción Arenal foi unha galega extraordinaria que se adiantou ao pensamento feminista peninsular do século XIX. Así o demostra a súa idea de que “a sociedade non pode en xustiza prohibir o exercicio honrado das súas facultades á metade do xénero humano”.
A cuestión feminina, a cuestión social e a cuestión penal son tres eixos arredor dos que vertebra o seu pensamento ético, feminista e humanista.
Pioneira do feminismo no seu tempo e, nun sentido amplo, dos dereitos humanos, o seu legado segue vivo, vixente e, malia todo, insuficientemente coñecido entre nós. Foi, porén, unha das figuras máis recoñecidas do seu tempo no ámbito internacional.
________________________________________________________________
MARÍA XOSÉ PORTEIRO GARCÍA (Madrid, 1952) é licenciada en Publicidade e Relacións Públicas, xornalista e escritora.
Viviu en Cuba até os 14 anos, cando a súa familia voltou á Galicia, onde desenvolveu a maior parte do seu traballo na comunicación, na xestión cultural e na política.
Desde 1972 traballou en prensa, radio, televisión e comunicación corporativa.
Publicou con X. A. Perozo o libro “Quen é quen non primeiro Parlamento Galego” e “Celso Emilio Ferreiro, compañeiro do vento e das estrelas”.
Publicou as novelas “Covardes”, “Sándalo” e “Buscando a Clara”.
Publicou o relato “Novelas para Xulia “ no libro colectivo “Libres e Vivas” e o ensaio “Vine, ví y hablé! Las mujeres frente al discurso público”.
En 2021 publicou a reedición en castelán da novela Cobardes (Belagua) e #taméneu, de opinión feminista.
Foi concelleira en Vigo (1987/1991 e 2003/2007), parlamentaria galega (1991/1997), deputada no Congreso (2004/2007), representante das Cortes españolas na Asemblea parlamentaria do Consello de Europa (2005/2007) e Delegada de Galicia na Arxentina e no Uruguai (2007/2009).
Traballou na organización da Capitalidade cultural europea de Compostela en 2000.
Entre 2009 e 2011 dirixiu o Museo del Ferrocarril de Madrid-Delicias e foi directora de comunicación da Fundación de los Ferrocarriles Españoles.
É membro do plenario do Consello da Cultura Galega desde 2014 e directora do Centro de Documentación en Igualdade e Feminismos (CDIF) desde 2017.
En 2019 foi elixida adxunta á Valedoría do Pobo.
Feminista comprometida cos dereitos humanos recibiu en 2009 a Encomenda ao Mérito Civil polo seu traballo en acción exterior; en 2019, o premio Primeiro de
Maio de CC.OO. ao compromiso social e á solidariedade e en 2020, o Ernestina Otero, polo seu labor e traxectoria feministas.
María Xosé Porteiro García tivo ao longo da súa vida unha traxectoria intelectual e política caracterizada polo seu galeguismo, feminismo e progresismo.
María Xosé Porteiro nunha das súas intervencións:
Máis eventos de tipo Xornada/Congreso
