Evento: Festival dos Eidos: Davide Salvado + Califato Dj Set

Davide Salvado é sen dúbida una das voces máis carismáticas do noso país. De formación autodidacta, leva media vida percorrendo as aldeas na procura de ritmos, coplas e danzas. De todas esas mulleres que se foi atopando, aprendeu non só a tradición na música, senón todo un modo de vivir.

O amor a todas esas prácticas tradicionais e o respecto pola terra, fan da maneira de entender o canto para Davide moito máis que simplemente música.

En 2003 comezou a súa carreira profesional xunto a Ugia Pedreira (Marful) e o grupo Ecléctica Ensemble. Pouco despois, uniuse como cantante e percusionista á banda do recoñecido gaiteiro Budiño, coa que virou por escenarios de medio mundo. A súa versatilidade permitiulle achegarse tamén a xéneros como o cabaret ou o teatro. Davide colaborou ademais en varios traballos discográficos, entre outros, Galiza de Kepa Junkera ou Sing me Home de Ioió Ma & Silk Road Ensemble, gañador do GRAMMY 2017 a Best World Music Album.

En 2011, editou o seu primeiro traballo en solitario, Árnica Pura, producido por Eliseo Parra, que esgotou catro edicións. Tras dous anos de xira, presentou Ou Ladrón de Amorodos, un espectáculo a trío xunto ao acordeonista Santi Cribeiro (Berrogüetto) e o percusionista e gaiteiro Cristian Silva. Con este espectáculo, Davide foi escollido polo xurado internacional para a sección oficial de WOMEX 2014, a feira de world music máis importante do mundo. Grazas a isto, conseguiu unha gran presenza nos medios especializados internacionais, onde falaron del como un dos grandes descubrimentos de 2014