Evento: Premios da Cultura Galega 2020
Premios da Cultura Galega 2020
A Xunta de Galicia celebra este xoves 8 de abril (18,00h) os Premios da Cultura Galega 2020 cunha gala especialmente simbólica que se converterá nun acto de recoñecemento ao traballo do sector ante a pandemia e na que se abordará a importancia da cultura como elemento imprescindible para a nosa sociedade. O acto, que terá lugar na Cidade da Cultura en Santiago, será retransmitido en directo a través da canle de Youtube de Cultura da Xunta para facelo accesible a todo o mundo.
Así, nun ano marcado pola covid-19, a gala –que estará plenamente adaptada ao actual contexto sanitario- reflexionará, a través de distintas pezas escénicas e audiovisuais, sobre o necesario papel da cultura galega e contará coa intervención de novos talentos galegos como o dueto Laura Lamontagne e PicoAmperio, a danza contemporánea de Kirenia Danza ou a soprano Laura Alonso, que pechará o evento interpretando o Himno Galego.
Nesta edición serán recoñecidas a excelencia creativa, a capacidade de intercambio, a experimentación e a proxección da construción cultural de Galicia a través dos seguintes oito galardóns e disciplinas:
· Letras: escritora Ledicia Costas
· Artes plásticas: fotógrafo Xurxo Lobato
· Artes escénicas: Federación de Teatro Afeccionado de Galicia (FEGATEA)
· Música: aCentral Folque
· Audiovisual: o exdirector da Filmoteca Española, Chema Prado
· Lingua: o dinamizador da cultura e lingua galegas, Xosé González
· Patrimonio cultural: Fundación Penzol
· Proxección exterior: responsable do Centro de Estudos Galegos en Budapest, Ildiko Szijj
O galardón desta edición foi elaborado pola artista Soledad Penalta.