Evento: Matinés do Principal: ELE

Sen facer moito ruído, pero inequivocamente atrevida, ELE, nome artístico da cantante e pianista madrileña Elena Iturrieta, acabou revelándose como unha das voces máis exquisitas e delicadas da nova escena española. "Summer Rain", o sorprendente álbum co que a descubrimos fai tres anos, levouna a tocar en 75 teatros do país, así como no festival South by Southwest Texas.

"What Night Hides", o seu segundo traballo, gravado no mítico Studio Two de Abbey Road, presenta a unha compositora de altura sen peaxes estilísticos e capacidade para abordar sentimentos como a nostalxia e a melancolía típicos de artistas veteranos. Soul, gospel, folk e canción de autor de elegancia extrema e substratos hipnóticos.