Evento: A internacionalización do libro galego

En colaboración coa Asociación Galega de Editoras, o Consello da Cultura Galega organiza a xornada A internacionalización do libro galego. As xornadas están dirixidas ás empresas editoras que desexen iniciar ou afondar no proceso de proxección exterior e de comercialización.

O obxectivo do encontro é duplo: por unha banda, adquirir información sobre as oportunidades de negocio no exterior a través das principais feiras internacionais e das experiencias de éxito dos gremios e editoras; por outra, establecer contactos con destacados representantes das feiras internacionais do libro coa finalidade de iniciar o proceso de internacionalización.