Evento: I Semana da novela negra

A I Semana da novela negra leva ao compostelán barrio de San Pedro unha serie de iniciativas organizadas arredor deste xénero literario, a través de distintos comercios e locais da zona. 

A acción está promovida pola Libraría Pedreira e conta cunha serie de actividades vinculadas á novela negra, tanto na parte puramente da narrativa como en outras vertentes, como banda deseñada, ilustración ou cinema. Haberá coloquios, debates e presentacións, coa presenza de escritores e escritoras de prestixio na literatura galega como Ledicia Costas, Elena Gallego, Miguel Anxo Fernández ou Diego Ameixeiras.

Como fío condutor das actividades, grazas á colaboración do escritor Héctor Cajaraville, creouse un misterio para que a xente que o desexe poida resolver: a desaparición no ano 2006 dun personaxe ficticio, Emilio Bugallido Matalobos, cuxo corpo apareceu neste 2018. Desde un mes antes, haberá unha serie de pistas repartidas polo barrio de San Pedro, nos 20 locais e comercios colaboradores, que permitirán identificar quen está detrás desta desaparición. Ao modo das clásicas novelas de misterio, existen varias persoas sospeitosas, cuxas testemuñas se poderán ler en documentos repartidos polos locais participantes.

Para facilitar o labor, hai 10 fragmentos dun relato onde se conta toda a historia de Emilio, e que se poderán atopar coa compra dos produtos marcados co distintivo da Semana da novela negra. A primeira persoa que acerte recibirá como premio un paquete de regalo consistente nunha cea, un agasallo e unha cartilla con vales desconto nos establecementos do barrio participantes, con validez para consumir os cupóns durante todo o 2018. Tamén haberá 20 cartillas con vales desconto para o resto de persoas que resolvan o misterio, que se coñecerá o 14 de abril.