Evento: Concerto de Rumbo Tumba

RumboTumba, é o proxecto de música instrumental do arxentino Facundo Salgado, quen, co seu Live Looping Set, fusiona ritmos orixinarios de distintas partes de América do Sur, principalmente música andina, con beats que coquetean tanto coa cumbia e os sons da selva como con ritmos netamente urbanos, como o Hip Hop ou a Electrónica. Instrumentos autóctonos e dixitais son executados, gravados e mesturados en tempo real, creando unha atmosfera de moito voo e movemento que convida ao baile, onde tradición e modernidade se complementan. Firmes grooves de baixo, sintetizadores e baterías electrónicas conviven co encanto sonoro do charango e os instrumentos de vento característicos da rexión dos Andes.