Evento: Everything flows, nothing dies

“Everything flows, nothing dies”, do artista francés Mathieu Le Sourd, “MAOTIK” afonda na relación entre a funcionalidade da luz do faro como guía e a capacidade expresiva na arte contemporánea, e reflexiona sobre a condición cambiante da natureza.

A instalación está composta por catro pantallas, ubicadas nos andares da Torre, nas que se proxectan paisaxes algorítmicas a partir de datos do movemento do mar e das correntes do aire. O espectáculo visual está acompañado con audios que evocan o son do océano, creando deste xeito unha experiencia inmersiva para as persoas que a visiten, e unha invitación á reflexión sobre os ciclos a vida e a relación do ser humano coa natureza. En palabras do artista, ‘Everything flows, nothing dies’ é “un recordatorio de que, se ben as formas e os estados poden cambiar, a esencia permanece”.

Tradición e vangarda mestúranse nesta proposta expositiva. O faro romano máis antigo do mundo, vencellado ao uso da luz como guía nunha construcción de milleiros de anos, adquire un papel de elemento expresivo dentro das artes dixitais, disciplinas en auxe a nivel global.

Sobre o artista

MAOTIK é un artista dixital de orixe francesa especializado na creación de espazos inmersivos, instalacións interactivas e performances audiovisuais que transitan entre a arte, a ciencia e a tecnoloxía.

Formado no ámbito dos medios e as artes dixitais no London College of Communication e a Universidad Pompeu Fabra de Barcelona, a súa produción emprega software feito á medida para transformar a percepción da realidade en tempo real. O seu enfoque da arte xenerativa defínese polo movemento fluído das imaxes e a súa integración en espazos inmersivos. A súa obra inspírase na natureza, abstraendo a súa esencia a través de esculturas audiovisuais baseadas na aleatoriedade, para crear experiencias únicas en cada ocasión