Rede galega de teatros e auditorios

Unha aventura por África evocando as peliculas dos anos 30 e 40... Quatermain, un cazador experimentado, é contratado por un magnate estadounidense para atopar as lexendarias minas do rei Salomón. Viaxes en avións de hélices, loitas con feras, enfrontamentos con canivais... incluso un encontro co mismísimo Tarzán... Unha divertida aventura por África cunha mensaxe ecoloxista. Cunha escenografía chea de sorpresas, Ghazafelhos aborda outro clásico co estilo ao que nos teñen acostumados como ; A Illa sen Tesouro, As Mil e unha noites ou o Vendedor de fume.

Seguindo a súa tónica de humor, o mago Paco ofrécenos unha vez máis un espectáculo de maxia infantil cheo de risas, cor e moitas sorpresas. 

A maxia do mago Paco caracterízase pola posta en escea de elementos visuais e moi chamativos que provocan unha dinámica constante enriba do escenario. Deste xeito ningún espectáculo é igual, todo depende da resposta do público, sobretodo dos máis cativos, xa que é un espectáculo pensado por e para eles. Nel poderán xogar, rir, brincar, actuar.... formando parte activa do seu fantástico mundo cheo de emocionantes aventuras.

Espectáculo de aventuras. A súa protagonista, Xela, unha nena de 9 anos, ten que liberara os seus compañeiros de escola atrapados polo malvado Demo Luciferino que, valéndose do Dragón Dracus traga-verbas, os ten escondidos na cova do trasno. Alí permanecerán ata que esquezan o galego, a súa lingua nai, e se convertan nos seus secuaces. Para iso Xela e os seus compañeiros de escola, teñen que enfrontarse o Luciferino e convencer Dracus Cus Cus do terrible mal que esta causando.

A Gramola Gominola é unha banda de auténtico Rock&Roll en galego para público cativo. Eles son Paco Cerdeira (Pakolas, Zënzar), Paula Romero (De Vacas, banda de Guadi Galego, Coro Encaixe), Anxelo de Xermar (Festicultores Troupe) e Rodrigo Muñoz  (S4N7, Nebra, Wealman).

Ópera Break´s é un espectáculo que mestura Ópera, Breakdance, Beatbox e Dj nunha única función de gran calidade artística que brota da conexión da soprano Esperanza Mara e os artistas urbanos do colectivo Vella Escola. Contan unha historia a través da expresión musical e corporal. Rompen as barreiras do clásico e do urbano, fusionándose nun espectáculo multidisciplinar onde o inimaxinable pode suceder… Atréveste a liberar a túa mente de preconceptos?

As vivencias coas que Leilía nos agasallou ao longo dos máis de trinta anos xuntas permítenos dicir que levan unhas Vidas Cantadas, como cantadas eran as vidas das mulleres das aldeas.

Vidas cantadas é unha aposta integral, un proxecto no que cadran orixe e fin, pechan o círculo e dentro del teñen cabida ilusións, premios, colaboracións, recoñecementos, viaxes, amizades..., e un sinfín de vivencias que mostran o que Leilía significa para a música deste país. O seu derradeiro espectáculo, con Vidas Cantadas Leilía din adeus definitivamente neste 2023

Vaivén é unha peza escénica de danza contemporánea que navega en mareas vivas.

Trala tormenta, o océano cuspe á beiramar todo aquilo afogado na profundidade. A area está chea de restos inconexos de memoria. Será suficiente este corpo para reconstruíla antes de que volva subir a marea? Unha investigación que se mergulla nas vibracións, nas ondas sonoras e que reverbera, á súa vez, no oceáno interior das emocións.

Sets de temas instrumentais orixinais tomados da tradición galega, principalmente do seu propio traballo de campo e investigacións nos últimos 30 anos, publicadas dende o Arquivo Castro Vicente , e os seus fondos documentais e sonoros, centrados en estilos de gaita e repertorios do interior de Galiza.

Unha comedia coral sobre como ser artista… e muller.
Contra vento e marea, seis intérpretes do presente navegan con seis artistas galegas do pasado nun cruceiro atemporal no que destaparán os seus segredos máis íntimos, para rir delas mesmas e, sobre todo, da estrutura patriarcal do sistema artístico.
Un cóctel de humor e amor, no que as seis intérpretes, súper polifacéticas todas, interpretan, cantan e bailan para falar da ARTE COMO CAMIÑO INEVITABLE.

Por cada respiración, por cada bágoa e por cada pinga de suor. Pioneras/Aitzindariak aúna nunha experiencia de danza a infinitos tipos de mulleres, abandera o cliché e destrúe o prexuízo sobre o xénero. Homenaxea ás pioneiras, as que iniciaron a batalla pola igualdade, acompaña ás que seguen pelexando, e conmemora ás que non tiveron a oportunidade de vencer.