A sexta edición de Cultura no Camiño desenvolverase do 16 de abril ao 30 de setembro nun total de 103 concellos situados nas diferentes rutas xacobeas de Galicia.
O programa xurdido ao abeiro da conmemoración do VIII Centenario da Peregrinación de San Francisco de Asís a Compostela desprega unha carteleira de 342 actuacións escénicas e musicais, protagonizadas por 146 formacións artísticas galegas. Artículase como un circuíto de espectáculos que ademais de contribuír á descentralización da oferta cultural, amplía as posibilidades de distribución do teatro, a música, a danza, a maxia e o novo circo producidos de maneira profesional na nosa Comunidade.
Espectáculo innovador de teatro, música e humor onde se mestura o coñecemento sobre as distintas familias de instrumentos, estilos musicais máis relevantes, instrumentos de refugallo...ofrecéndoo dun xeito divertido, didáctico e orixinal, dirixido a un público infantil e familiar.
A parte activa deste espectáculo somos Os Tres Tenedores contando tamén coa colaboración dos rapaces e rapazas.
Un cociñeiro, un camareiro e un xefe de cociña amosarannos o seu singular método de elaborar un menú no prestixioso restaurante Os Tres Tenedores.
Unha adaptación do espectáculo “Cocido Sinfónico” que conta coa mesma esencia, mantendo a mesma trama, pero con outro tipo de recursos materiais e artísticos.
Actuación dentro do programa Cultura no Camiño. Confirmar datas e horas nos concellos onde se representa.
Colgadas no tendal, as letras senten o sol a facerlles cóxegas e bailan unhas coas outras. A roupa tamén quere xogar coma elas: as pinzas axudan a un pano a medrar ata se converter nunha montaña, unha toalla foxe correndo entre as cordas... ou é un can de palleiro?
Este espectáculo de Raquel Queizás xoga a tensar os límites entre teatro, monicreques e pantomima, e con eles as fronteiras da imaxinación máis alá do escenario, case nada é o que parece.
Sinopse: Mofa & Befa irrompen nunha académica conferencia sobre o famoso autor para por en primeiro plano as escenas máis ignoradas, por desidia ou falta de oportunidades, polo público actual. O riso máis cruel. As intimidades máis vergoñentas, os actos máis deshonestos e as vilanías máis astutas serán mostradas pola impiedosa máquina cómica de Mofa&Befa. Asasinos, xuíces, bufóns, cornudos, chivatos, racistas, oportunistas, chulos, torturadores, todas as personaxes que nunca teñen o protagonismo, terán agora a oportunidade de mostrarse agora no primeiro plano.
Cociña Económica de Mofa e Befa é un dos espectáculos míticos do dúo cómico formado por Evarsito Calvo e Víctor Mosqueira.
Un espectáculo con case 20 anos de percorrido e que a día de hoxe continúa sendo un dos máis queridos polos fans de M&B.
Fran Rei presenta o seu novo espectáculo unipersoal, no que sigue misturando narración oral, humor e maxia para contarnos Os Contos de Barriga Verde.
Escrito por Avelino González, a partir de tres das obras máis sobranceiras do escritor Manuel María (Barriga Verde, Os Soños na Gaiola e Aventuras e desventuras dunha Espina de toxo chamada Berenguela), Os Contos de Barriga Verde pretende ser un achegamento á poesía, prosa e teatro do autor lucense.
Os Sete Magníficos máis Un presentan Concerto Magnífico, unha revisión clown e desafinada do, ata agora, sempre serio mundo da música culta.
Creada pola propia compañía en colaboración co prestixioso dramaturgo e director arxentino Walter Velázquez, a partir de farsas circenses clásicas, dirixida por Iván Prado e protagonizada por Pedro Brandariz e Fran Rei, Concerto Magnífico é a decimo quinta produción de Os Sete Magníficos máis Un, que volven dirixirse ao público infantil e familiar despois de case catro anos xirando con Dous Pallasos en Máis Apuros (2011).
Cenizas Tour é un espectáculo que mestura a forza e enerxía do directo dunha banda musical con elementos teatrais para crear un concerto diferente, un espectáculo persoal.
A danza, o teatro, os elementos escenográficos e a iluminación son aspectos cos que se xoga na creación do espectáculo para xuntar diferentes disciplinas artísticas e mesturalas sobre as táboas creando un xogo multidisciplinar que é absolutamente atractivo para o espectador. Un espectáculo para escoitar pero tamén para mirar.
A partires do poema de Manuel María "Os peixes do Miño", contamos, debuxamos e musicamos unha historia onde haberá: aventuras ,perigos, medos a perda de inspiración, amor e moito Manuel María.
Esta actividade está baseada no libro "O poeta do Miño" Edicións do Cumio 2015, da que somos autores.
