Teatro

No mundo hai linguas de todo tipo e tamaño. Unhas máis falangueiras, outras máis longas, algunhas tan enormes que enchen a boca, outras tan morniñas que non dan dito nada, e algunhas tan afiadas que mesmo parece que aguilloan ao falar. E entre todas elas está a nosa, a galega. Con “A parábola do angazo” e desde o humor e a reflexión bótase unha ollada ao noso pasado, para poder ter outra perspectiva do presente e mesmo mirar de esguello o que haberá no futuro.

Este novo espectáculo teatral forma parte da andaina lingüística iniciada con “Bicos con lingua” e “Pelos na lingua”.

Espectáculo de conta contos no que dúas nenas, durante unha festa de pixamas, descobren un libro secreto cheo de historias fascinantes con mulleres como protagonistas.

Idade: de 4 a 11 anos.

Os históricos exploradores Magallanes e Elcano embárcanse na gran viaxe que dará a volta ao mundo na procura das illas Molucas. Unha aventura na que transitarán durante tres anos por caminños descoñecidos nos que lles agardan arestas, confusións e moitos misterios cos que rozarán a loucura. O proxecto teatral xorde a partir dos actos de celebración do V Centenario da Primeira Volta ao Mundo para conmemorar a estas figuras históricas e recrear os episodios da viaxe arredor do globo terráqueo.

Ponten Pie trae aos escenarios unha auténtica xoia visual para o público familiar na que se presenta o conflito interno de dous irmáns que rexeitan a súa condición de habitantes terrestres e desexan adaptarse a vivir baixo a auga, como a tribo asiática dos Bajau. O espectáculo transita polos derroteiros da imaxinación e a fantasía de ambos personaxes ata que cumpren o seu soño, conducindo entón ao público a un novo universo, o reino da auga, un lugar onde atoparnos a nós mesmos e entender as nosas orixes e o que verdadeiramente queremos ser.

Laura Gómez-Lacueva, Ingrid Magrinyá e Inma Nieto realizan un espléndido traballo actoral para narrar unha historia triste, a de un diagnóstico inesperado que bota polo chan a vida cotiá de dúas mulleres con personalidades moi diferentes pero que asoman ao mesmo abismo. O seu autor, Eusebio Calonge, trata da busca da alegría no medio desta viaxe sen retorno. A dirección corre a cargo de Paco de la Zaranda.

Las Niñas de Cádiz presentan en “El viento es salvaje” unha obra ao estilo das clásicas traxedias gregas que se fusiona co xénero musical da chirigota creando unha peza completamente única en clave de comedia. Dúas figuras da mitoloxía grega, Fedra e Medea, envólvense nun enfrontamento motivado polos celos, a culpa, as paixóns e os amores prohibidos coa cidade de Cádiz como pano de fondo. Esta singular traxicomedia recitada en versos de marcado ritmo recibiu no 2020 o Premio Max ao Mellor espectáculo revelación. En castelán.

Elefante Elegante presenta este espectáculo teatral de fantasía, humor e poesía dirixida a público infantil e familiar que evoca a amizade, as separacións, a necesidade de coñecemento e a aventura de medrar desde a igualdade, rompendo os arquetipos de xénero.

Chega ao FalaRedes unha peza teatral pensada para público de máis de 14 anos e destinada a poñer en valor a educación en lingua galega e a igualdade, ao tempo que se reivindica a figura da pedagoga coruñesa María Barbeito. Escrita por Paula Carballeira e dirixida por Fina Calleja, está interpretada por Mónica Camaño e Anabell Gago.

"Los perros, propón acadar un estado de resistencia; como cans que deambulan, cans que se atopan, que se recoñecen vulnerables, que comparten alegría, pero tamén dor, que caen e se levantan, que bailan, que se rebelan a través do amor, a xenerosidade e o compromiso, para atopar nese traxecto común o sentido das súas propias vidas, para superar xuntos a violencia e a deterioración.

Los dioses y Dios é un percorrido sorprendente, emocionante e cómico pola mitoloxía ou mitoloxías ás que se aferra o ser humano cando se asoma ao abismo do descoñecido. Dilucidar o misterio da vida é o anhelo incesante de toda sabedoría. De momento non hai ciencia que poida iluminar a orixe descoñecida, ou o destino final da existencia. Por iso existe a arte, a metáfora, o conto, o teatro, o relato.