Raíz/folk

Alma da Terra é un espectáculo que se basea nun concerto cun claro obxectivo, dinamizar a lingua e cultura galegas, mediante a interpretación de versións de cancións populares, temas propios e poemas musicados.

Cunha posta en escena de 9 instrumentistas interpretando diferentes instrumentos musicais e un vocalista, farase un repaso por aquelas letras e melodías que deixaron pegada na historia recente da música galega, sempre na busca de transmitir todo tipo de sensacións e emocións aos oíntes.

Patricia González e Alejandro Balbuena forman Acordeireta. Despois dunha longa traxectoria individual, deciden xuntar o acordeón e a pandeireta para divertirse, para seguir alimentando as súas almas, polo gusto de transmitir un sentimento arraigado ás nosas raíces, por reivindicar temas sociais dos nosos tempos, por homenaxear con música a persoas queridas e admiradas e sobre todo, para dignificar a nosa lingua, a cultura galega e compartilo con vós.

Felisa Segade, Estevo Lamas e Xosé Antón Ferreira son Tres Pesos.

Tres xeitos de facer, tres adictos á nosa música, tres caras da mesma moeda. Un proxecto, un soño. Tres músicos, tres voces e tres vidas vinculadas a ducias de proxectos culturais; Malveiras, Colexiata, Pradairo, Limagoia, A Ponte Vella, Ker-cuez, Estivada de Calo, Arreixeira, Leilía, Liceo de Noia, Brincadeira,... centos de horas sobre o escenario e miles fora del soñando coas música e tradición galegas.

Uxía, unha das maiores embaixadoras da música galega, presenta clásicos do seu repertorio arranxados especialmente para o formato trío, acompañada polo acordeonista João Gentil e o percusionista Quiné, dous dos mellores músicos da Península.

A riqueza do noso patrimonio musical galego e a posta en valor dos novos talentos que compoñen en base á tradición, son o fío conductor de “Dende o meu balcón”, o sexto disco de Susana Seivane que supón o retorno ao sustrato ancestral sobre o que Susana construiu a súa carreira. 

Trío Compostelán formado por músicos dunha dilatada experiencia musical en diferentes formacións de música tradicional e folk que percorrerán o Mercado de Nadal de Santiago levando as mellores melodías tradicionais galegas desta época do ano.

Trío peculiar formado por Andrea Pérez no saxo, Raquel Fernández na tuba e Pablo Dalama na gaita presentan un repertorio musical animado e divertido para gozar na familia.

O grupo A Quenlla créase no ano de 1984 por dous membros fundadores e escindidos do grupo Fuxan os ventos que deixaran no ano 82. Ao longo da súa traxectoria de concertos e gravacións, con distintas formacións evolutivas, contan con traballos e proxectos levados a cabo para a dinamización da cultura tradicional e de autor dentro dos vieiros da nosa música. Ao longo dos anos foron moitos os concertos, charlas didácticas e encontros levados adiante por un grupo de mulleres e homes que tiñan a teima da concienciación social na honra e orgullos do Noso.

O nome da banda inspírase nun ser mitolóxico galego

O nome do grupo galego de folk e música tradicional orixínase polo significado de Moura, que é un ser mitolóxico prerromano galego. Existen diferentes lendas sobre este ser que conta con habilidades sobrenaturais, por iso é unha fonte de inspiración para este grupo que quere promover a cultura e tradición galega entre os máis novos.

Os asistentes aos seus concertos viven unha experiencia marabillosa que axuda a coñecer as súas propias raíces.

Susana Seivane comezou a tocar a gaita no balcón da súa casa durante o confinamento para animar os seus veciños. Gravaba estas actuacións cada día para retransmitilas nas súas redes sociais, ás que se conectaban milleiros de seareiros desde distintos puntos do planeta para asistiren a esta cita diaria.

En tempos de desconfinamento, a gaiteira continúa esta iniciativa da man do Fondo de Proxectos Culturais Xacobeo 2021 en balcóns emblemáticos de poboacións do Camiño de Santiago.