Proxección audiovisual

O clan Toda reúnese para celebrar o 69ª aniversario do patriarca. Pouco despois, este morre de maneira repentina. Os fillos descobren que acumulaba moitas débedas e vense obrigados a vender a casa familiar. A máis nova deles, Setsuko, ve escapar o seu prometido ante esta situación económica desfavorable e debe buscar un novo fogar xunto á súa viúva nai. Ambas saltan de vivenda en vivenda dos seus familiares, mais ninguén semella contento de acollelas.

Du côté de la côte. Diario persoal e filme de viaxes feito para a Oficina de Turismo francesa, unha estrutura libre permítelle a Varda abordar as cuestións e as paisaxes máis variadas, creando produtivas analoxías a través dun percorrido pola Costa Azul francesa.

1923, unha zona rural no centro de Xapón. Unha muller viúva con poucos recursos traballa duro para poder darlle estudos ao fillo. 1936, Toquio. O mozo casou e acaba de ter un bebé. Recibe a visita da nai. Atopou un emprego como profesor en quendas de noite e pasa por dificultades económicas. Teme confesarlle as súas frustracións á proxenitora: despois dos esforzos todos que ela fixo, el tamén se encontra loitando por sobrevivir.

Precisamos intelixencia artificial para conseguir sistemas de xustiza independentes? Conseguiriamos eliminar a influencia do poder político e económico que distorsiona os nosos sistemas xudiciais? Conseguiriamos reducir os rumbos ideolóxicos e emocionais da xustiza humana? Artificial Justice é un documental especulativo que explora as cuestións máis inquietantes dunha eventual introdución de IA en institucións críticas das nosas democracias. Este documental é a base de investigación da película Justicia Artificial.

_ _ _

Comezos dos anos trinta, depresión económica. Un pai solteiro chega a Toquio cos dous fillos na procura de traballo. A situación é complicada, os rapaces pasan fame e andan pola rúa á busca de cans que entregar ás autoridades, que ofrecen recompensas para vacinalos. Iso permítelles obter un teito cada noite nunha vida errante que non pode durar por moito máis tempo. O seu proxenitor é por fin contratado nunha fábrica, mais a súa obsesión por facerlle as beiras a unha nai solteira, en situación similar á deles, faille perder o siso.

Dúas historias de amor paralelas en que as parellas se ven frustradas por obstáculos ocultos e inevitables, a forza da superstición e a mecánica do poder.

Unha familia con dous nenos múdase ás aforas de Toquio para que o pai poida vivir máis preto do xefe, por quen se desfai en atencións. Os rapaces teñen un inicio complicado na escola, con matóns que abusan deles, e acaban faltando ás clases. O seu proxenitor empúrraos á excelencia e a ser homes importantes, mais eles comezan a decatarse de que seu pai está disposto a humillarse con tal de agradar o seu superior e inician unha rebelión na casa.

Ensaio que usa poemas de Wallace Stevens sobre filmacións dos lugares nos que viviu, tal como se atopan hoxe en día. Impresionante montaxe e gran fotografía de Alberte Branco, nun filme de elegante acabado. Premiado no festival de Xixón.

Con presentación e coloquio do seu director, César Souto.

Hikashi e Jiro traballan nunha fábrica de produción de cervexa dun barrio popular de Toquio e comparten casa co fillo do primeiro, Tomio, que asiste con interese á escola primaria. O pai, viúvo, é un completo analfabeto borracho que o cría, máis que o educa. Unha noite, á saída dun espectáculo de rōkyoku, crúzanse con Harue, unha moza que está sen fogar nin traballo. Hikashi decide axudala, mais Jiro pensa que iso só lles vai traer problemas.

Leo é unha muller que vive de recoller cartóns nun polígono industrial nos arrabaldes de Madrid. Unha noite coñece a Salva, vixiante, nun bar. Este intenta conseguirlle un novo traballo e axiña se interesa por un pasado que intúe revirado. Obsesiónase con Leo, quen lle realiza unha inusual petición: debe matar a Gabo, un profesor de artes marciais co que tanto Leo como a nai dela mantiveron unha relación anos atrás.

Última longametraxe na carreira de José Luis Borau, que obtivo o Goya ao mellor director.