Proxección audiovisual

Hong Kong, 1962. Chow, redactor xefe dun xornal local, múdase coa súa muller a un edificio habitado principalmente por residentes de Shanghai. Alí coñece a Li-zhen, unha moza que acaba de instalarse no mesmo edificio co seu home. Ela é secretaria dunha empresa de exportación e o seu home está continuamente de viaxe de negocios. Como a muller de Chow tamén está case sempre fóra da casa, Li-zhen e Chow pasan cada vez máis tempo xuntos e fanse moi amigos. Un día, ambos descubrirán algo inesperado sobre as súas respectivas parellas.

Tras cumprir cinco anos de condena, Tony Le Stephanois sae de prisión coa intención de cambiar de vida, pero atópase con que a súa amante está cun coñecido gángster. Como carece de recursos económicos, non lle queda máis remedio que volver á súa vida pasada e reunirse cos seus vellos compañeiros. Durante semanas prepara minuciosamente con eles un golpe perfecto: o atraco a unha inaccesible xoiería de París.

Cando o traballador non cualificado Martin Eden coñece a Elena, a filla dunha rica familia de empresarios, é amor a primeira vista. A rapaza refinada e culta non tarda en converterse nunha obsesión para Martin, que espera que os seus soños de facerse escritor o axuden a superar as súas humildes orixes e lle permitan casar con Elena.

Harry Fabian traballa a comisión como gancho dun club, pero é ambicioso e soña con facerse independente. Para acadalo non dubidará en enganar ao campión do mundo de loita grecorromana para que se enfronte ao seu fillo Kristo, que controla a loita en Londres.

Despois dunha profunda depresión pola morte da súa amante nun accidente de coche, o doutor Vicente chega xunto á súa muller Mariña a unha remota illa atlántica coa intención de pasar o verán, curar a súa enfermidade e recuperar o seu matrimonio. A vida na solitaria illa séntalle ben a Vicente, que pide á súa muller prolongar a estancia e pasar o outono. Cada día vaise sentindo mellor ata que tras un naufraxio no medio dun temporal, unha misteriosa e amnésica muller estranxeira aparece na illa e irrompe nas súas vidas. A partir dese momento xa nada volverá ser o que era.

Diario íntimo dunha muller de clase acomodada ilustrado polas filmacións caseiras do seu marido, un rico industrial, entre os anos 40 e 60 do século pasado. O filme é tamén un melodrama clásico ao Douglas Sirk ou Todd Haynes, cos sentimentos a flor de pel. Unha viaxe a través da vella Europa. Un ensoño romántico.

Nick Garcos, un camioneiro que gaña a vida transportando froita en durísimas condicións, decide non someterse ás presións dos dirixentes de sindicatos mafiosos que no seu día estafaron e mutilaron ao seu pai.

Agatha Christine, de 10 anos, é unha fanática dos misterios. Tanto que creou unha axencia de detectives privados no soto da súa casa á que acaba de mudarse coa súa familia. O seu primeiro crebacabezas levaraa a un asunto moito máis complexo do que ela esperaba...

O filme está recomendado para nenos e nenas de 6 anos en diante e vai ser proxectada na súa versión dobrada ao castelán

Ano 2019. Neo-Tokyo é unha cidade construída sobre as ruínas da antiga capital xaponesa derruída tras a Terceira Guerra Mundial. Xapón é un país ao borde do colapso que sofre continuas crises políticas. En secreto, un equipo de científicos retomou por orde do exército un experimento para atopar a individuos que poidan controlar a arma definitiva: unha forza denominada "a enerxía absoluta". Pero os habitantes de Neo- Tokyo teñen outras cousas das que preocuparse. Un deles é Kaneda, o líder dunha banda de motoristas.

Unha abafante madrugada neoyorkina, a modelo Jean Dexter é asasinada a sangue frío. O tenente de homicidios Daniel Muldoon faise cargo do caso coa axuda dun mozo e competente detective, Jimmy Halloran. Mentres os policías tratan de desentrañar os motivos que conduciron á morte da moza e de atopar o seu asasino, a vida cotiá segue como se tal cousa no corazón da poboada urbe.