Exposición

O Universo de Xaime Quessada é unha mostra retrospectiva da carreira do artista ourensán, un dos pintores galegos máis importantes de século XX.

Mostra bibliográfica para conmemorar o centenario da publicación da Revista Nós: boletín mensual da cultura galega.

Mostra composta dos libros sobre un dos momentos literarios e creativos máis importantes de Galicia con figuras destacadas como Castelao, Ramón Cabanillas, Otero Pedrayo, Losada Diéguez, Vicente Risco, Francisca Herrera Garrido... ; obras escritas polas autoras e autores, biografías, novelas ambientadas na época, películas, publicacións seriadas.

Materiais para pensar, gozar e profanar é unha exposición que recolle a obra plástica de María Xosé Queizán, unha das pioneiras da narrativa feminina en galego e referente do pensamento feminista en Galicia.

Ao longo da súa dilatada traxectoria foi capaz de expresar as súas ideas e reflexións a través da arte no seu sentido máis amplo.

Mostra bibliográfica con libros para pequenos sobre o samaín e contos de medo.

Poderase visitar na sala infantil no horario de apertura da biblioteca.

Mostra bibliográfica de contos sobre o outono, guías sobre árbores e natureza, rutas por Galicia.

Poderase ver na sala infantil no horario de apertura da biblioteca.

Staffam Mörling. Homenaxe, é unha exposición que presenta unha colección de fotografías realizadas por Steffan Mörling na illa de Ons entre 1963 e 1966 e polo seu irmán Mikael Mörling en 1972.
Unha homenaxe ao antropólogo sueco onde se recollen fotografías antigas da illa de Ons e que reflicten os usos, costumes e o traballo dos insulars. Mörling está considerado o gran impulsor do «estudo e recuperación das embarcacións tradicionais en Galicia» e xunto á súa esposa, Josefa Otero, desenvolveu un «interesante traballo de campo» sobre os costumes de Ons.

Manual de uso é unha exposición de La Ribot (Madrid, 1962) na que se mostra un percorrido polos seus traballos dos últimos vinte anos. As obras que integran a exposición están, como todo o seu traballo, en unión compacta da danza coas artes visuais.

O Mes da Historia Negra – Black History Month – é unha conmemoración anual para homenaxear ás persoas afrodescendentes que, aínda hoxe, sofren o racismo institucional e cotián que impera nalgunhas sociedades desenvolvidas.

A orixe desta iniciativa remóntase ao 1926, cando Carter G. Woodson instituíu nos EEUU a Semana da Historia dos Negros. Elixiuse a segunda semana de febreiro coincidindo cos aniversarios do presidente Abraham Lincoln e do abolicionista Frederick Douglass. A partir de 1976, a semana inicial ampliouse a todo un mes.

O Día das Letras Galegas é un día de exaltación da lingua de Galicia a través da súa manifestación literaria. Comezou a celebrarse o 17 de maio do 1963, coincidindo co centenario da primeira edición de Cantares gallegos, de Rosalía de Castro.

Este ano o autor homenaxeado é Ricardo Carvalho Calero (Ferrol,1910 - Santiago de Compostela, 1990). Sobresaíu como historiador da literatura, crítico literario, filólogo e escritor, e dedicou a súa vida a dignificar o idioma e a cultura galegas.

Conmemoramos o centenario do nacemento da revista Nós cunha mostra que recolle unha selección dos libros da colección da biblioteca escritos polos membros da Xeración Nós, acompañada dunha exposición gráfica e audiovisual dalgúns contidos relevantes da revista.