Os Carunchos renden homenaxe ao poeta Manuel María musicando unha selección dos seus poemas. Un traballo de celebración do 30 aniversario da formación cun repertorio dedicado integramente ao gran Poeta da Terra. Deste encontro prodixioso entre a música e a palabra xorde UNHA GORXA CHEA DE PAXAROS, un traballo inzado de versos, cos que celebrar a longa vida dunha das bandas fundamentais da música tradicional galega.
A cantante de world music, Nastasia Zürcher, unida a Terrae, unha banda que esconde tras dúas máscaras ancestrais a un produtor musical e un DJ con moitos anos de experiencia, dúas mentes coas ideas moi claras e cunha proposta que mestura electrónica, percusión, danza contemporánea e creación visual.
Un agasallo de ritmos electrónicos bailables con sons e músicas tradicionais de todo o planeta, unha viaxe que tenta achegar as persoas á natureza a través da danza e berrar a conciencia colectiva para protexer e coidar máis o planeta Terra.
Eris Mackenzie é o proxecto do produtor e compositor coruñés Carlos Eirís, que fusiona electrónica de vangarda con elementos da tradición galega. O artista combina electrónica, minimal-techno ou hardstyle con alalás, jotas e melodías populares para construír un son propio. Autodidacta, crea desde un espazo moi persoal no que o piano e a produción dixital dialogan para dar forma a unha identidade sonora única.
Santero y Los Muchachos encaran o 2026 coa seguridade tranquila de quen fixo as cousas ben, paso a paso, canción a canción. O róximo outono empezarán unha nova xira para presentar en directo o que será o seu novo traballo, titulado “Todas las luces”, o cuarto álbum de estudo e quinto da súa carreira. Este circuíto é tamén a confirmación dun crecemento orgánico que non entende de atallos, só de constancia, honestidade e unha conexión real co seu público.
A agrupación Habana Café Son naceu co obxectivo de render homenaxe á rica herdanza da música tradicional e popular cubana.
Cunha formación que inclúe voces, guitarra, baixo e percusión, estes músicos reviven o sabor e a autenticidade destes e outros xéneros caribeños, incluíndo tamén temas do panorama musical actual, brindando ao público unha experiencia única e envolvente.
Habana Café Son destaca polo seu compromiso coa calidade musical e polo seu desexo de compartir a esencia da música en rigoroso directo.
Uxía lambona e a Banda Molona é unha banda musical infantil que nace no ano 2014 e está formada por Pali ao baixo, Ñoc á batería, Diego á gaita e frauta, Serghaño á guitarra, Roscón ao acordeón e Uxía cantando e animando!
A Gramola Gominola cumpre 10 anos! E celébrao cun espectáculo cheo de música, humor e rock&roll con moitas sorpresas en forma de agasallos musicais a través dunha revisión dos temas máis coñecidos e máis reclamados polo público gramoleiro. Estará asegurada a diversión e a participación para que a experiencia do concerto sexa moi festiva, emocionante e enérxica, á altura dun 10º aniversario! Seguirán a transmitir mensaxes en prol dá igualdade, a lingua, o ecoloxismo e a educación.
Son ás 6 da tarde: bocata de chourizo fronte ao televisor e os ollos coma pratos. Songoku, Arale e Novita falan en galego!
O concerto tributo LEMBRA XABARÍN convida aos pequenos e pequenas a compartir o amor pola nosa lingua a través dos debuxos animados e a música.
A proposta deste concerto é rememorar os anos oitenta e noventa a través da música que encadenaba os capítulos dos debuxos animados no Xabarín clube. Daquela, falar galego era rock&roll, era punk, era desafiar ao sistema.
LUMIERO é un espectáculo visual e musical para a primeira infancia. O seu protagonista, Lumiero, protagonizado polo pallaso Pere Hosta, vive rodeado de luceciñas e sombras que cobran vida. Xunto á súa filla Lumina, exploran un mundo tenro onde os obxectos brillan e a música acompaña cada movemento. Sons creados con instrumentos, xoguetes e dispositivos que xeran unha atmosfera máxica e tranquila.
SUÁREZ nace da idea de homenaxear a vida e a obra de José Suárez, tal vez o fotógrafo galego máis recoñecido internacionalmente. Un concerto de música orixinal escrita para guitarra eléctrica, arpa e teclado executada en directo mentres gozamos dun espectáculo de videocreación en vivo con fotografías orixinais dixitalizadas, así como fragmentos de películas en 8mm.
Elenco artístico:
Rafa Fernández: Guitarra eléctrica
Bleuenn Le Friec: Arpa
Virxilio da Silva: Guitarra eléctrica
Álex Salgueiro: Teclados
Iván Torres: Visuais
