Allariz (Ourense), 21 de setembro de 2024

O conselleiro de Cultura, Lingua e Xuventude, José López Campos, participou hoxe nos actos de celebración do 140 aniversario do nacemento de Vicente Risco, organizados en Allariz pola fundación dedicada ao intelectual. Unha efeméride na que o representante da Xunta gabou o labor desta entidade polo “gran traballo que realiza por manter vivo un legado tan importante para Galicia, de cara a ao seu coñecemento polas xeracións futuras, e polas súas iniciativas en prol da cultura en xeral”.

Santiago de Compostela, 21 de setembro de 2024

O Centro Dramático Galego estrea a comezos deste outono cinco das coproducións impulsadas durante este 2024, coincidindo coa celebración do seu 40º aniversario. Trátase dos espectáculos Territórios de liberdade, Entrepalav-bras, As formas do amor, Lémbrame, Spominaj na Mnje e Frágua de amor, para os que a unidade teatral da Xunta de Galicia estableceu alianzas con tres compañías galegas, oito portuguesas e unha alemá.

Vigo, 20 de setembro de 2024

Títulos emblemáticos do cinema fantástico e propostas interxeracionais conforman o núcleo da programación do oitavo Galician Freaky Film Festival, que se desenvolve en Vigo desde hoxe a ata o vindeiro día 28. O certame volve contar co apoio económico da Xunta de Galicia a través da convocatoria anual de subvencións a festivais do sector audiovisual, que este ano distribuíu 300.000 euros entre 10 mostras do sector, cifra que supuxo un incremento do 33% respecto a 2023.

París, 20 de setembro de 2024

O conselleiro de Cultura, Lingua e Xuventude, José López Campos, fixo hoxe entrega en París ao embaixador de España ante a Unesco, Miquel Iceta, do primeiro avance do expediente da candidatura Paisaxe da auga: Ribeira Sacra de cara a acadar en 2026 o recoñecemento como Patrimonio Mundial. Trátase dun trámite necesario para avanzar no futuro do territorio para obter o máximo recoñecemento da Unesco.

Santiago de Compostela, 20 de setembro de 2024

O director xeral de Cultura, Anxo M. Lorenzo, presentou hoxe no Centro Galego de Arte Contemporánea (CGAC) a  exposición que reúne as obras da artista visual Mayte Vieta. O Son do Mar que se inaugura esta tarde e poderá verse ata o 19 de xaneiro.

Santiago de Compostela, 19 de setembro de 2024

A tempada expositiva das galerías de arte promovida pola Asociación das Galerías de Arte de Galicia co apoio da Xunta de Galicia comezou hoxe en Santiago de Compostela, A Coruña e Vigo. O programa Aberto 24 comezará mañá tamén en Ourense e ofrece así a oportunidade de gozar da produción artística en nove galerías.

Santiago de Compostela, 19 de setembro de 2024

O secretario xeral da Lingua, Valentín García, participou hoxe na presentación do espectáculo Camiño Máxico no Pico Sacro, que conta co apoio da Xunta de Galicia e se desenvolverá o 28 de setembro neste espazo natural do concello coruñés de Boqueixón. Trátase dun musical da compañía Queiman e Pousa, que narra a lenda do Apóstolo Santiago e da Raíña Lupa. A actuación é de entrada libre e de balde.

Santiago de Compostela, 19 de setembro de 2024

O cinema galego volve contar cunha sección propia no London Spanish Film Festival, denominada Letters from Galicia, para exhibir na capital británica algunhas das producións do cinema galego máis recente. A Xunta de Galicia colabora coa asociación Proxecta, Coordinadora Galega de Festivais de Cinema, e a plataforma Galician Film Forum nesta segunda edición da iniciativa ao abeiro do certame londiniense, que se desenvolve desde onte e ata o vindeiro día 25.

Ourense, 18 de setembro 2024

O director xeral de Cultura, Anxo M. Lorenzo asistiu hoxe ao acto de inauguración da mostra O anxo que nunca fun do fotógrafo ourensán Manuel Outumuro que se enmarca no Ourense Film Festival. Trátase dunha cita na que destacou a traxectoria profesional do artista, con máis de 30 anos de intensa produción fotográfica e numerosos recoñecementos, como o premio Ourensanía en 2022.

Santiago de Compostela, 18 de setembro 2024

O director xeral de Cultura, Anxo M. Lorenzo asistiu hoxe ao acto de inauguración do VI Festival de Música Antiga e Barroca organizado polo Ateneo Barroco que se celebra do dous ata o 16 de outubro e que conta coa colaboración da Xunta de Galicia. Neste encontro convidou á cidadanía a achegarse ata Santiago de Compostela para “gozar da cultura e da música neste encontro ao que se van achegar artistas destacados desta modalidade musical”.