Evento: Circando

A Gala de circo na rúa, de grande formato, conta sempre coa participación de tres compañías e unha banda de música ao vivo nun espectáculo para todos os públicos, de 100 minutos de duración, co mellor do noso novo circo introducido por unha mestra ou mestre de cerimonias que dá paso a unha grande variedade de espectáculos e números circenses. A interacción entre as tres compañías participantes, a participación do público, a variedade de técnicas artísticas, as espectaculares acrobacias aéreas, o encanto da música en directo, a presenza dun presentador ou presentadora como nexo do espectáculo e toda a maxia e ilusión do circo son eixos e os maiores atractivos desta Gala de circo na rúa. Sen dúbida, un dos mellores espectáculos de rúa de Galicia.

Culturactiva Producións somos unha compañía e produtora que fai realidade as necesidades reais dos programadores e programadoras, froito do noso coñecemento do sector como distribuidora. Con pezas como Falar sen Cancelas, Sénior ou Saaabor! no noso haber, temos unha produción teatral constante con espectáculos adaptados a todo tipo de espazos e requerimentos, a datas sinaladas e sempre creamos pensando no público ao que nos diriximos. O humor e a versatilidade son as nosas señas de identidade.