Evento: Triángulo de Amor Bizarro

Triángulo de Amor Bizarro é unha banda galega de indie rock, noise rock e post-punk formada en 2004.

O grupo formouse na Coruña aínda que os seus membros son de diferentes lugares do Barbanza, e da Coruña. Toman o seu nome da canción «Bizarre Love Triangle» do grupo británico New Order. Antes da gravación do seu primeiro disco, Triángulo de Amor Bizarro gravou dúas maquetas autoproducidas que chegaron ás semifinais do concurso de maquetas Proxecto DEMO do Festival de Benicassim dous anos seguidos, en 2004 e 2005. Nos seus comezos o grupo era un cuarteto, derivando co tempo nun quinteto antes da gravación do seu primeiro disco, no que se formarán como trío, ata a entrada de Óscar Vilariño e Rafael Mallo, coa saída de Julián Ulpiano(batería) en 2009.

Unha vez que fichan polo selo Mushroom Pillow, gravan o seu primeiro disco, Triángulo de Amor Bizarro (2007), co técnico Carlos Hernández, coñecido pola produción de discos de música independente de bandas ben coñecidas como Os Planetas, Sr. Chinarro ou Mercromina. O disco recolleu moi boas críticas entre a prensa especializada, aparecendo nos primeiros postos entre os discos españois de 2007 (posto 2 na revista Mondosonoro e o 9 en Rockdelux). Ademais tamén foi recollido entre os mellores da década nos medios musicais máis influentes, como Rockdelux, Mondosonoro, Jenesaispop e outros.

Ese mesmo ano publícase tamén O Home do século V, disco no que se compilan as cancións das súas dúas maquetas xunto con outras tres novas.