Evento: Festicultores Troupe 15º aniversario

Unha banda con 15  anos de historia e máis de 800 actuacións por varios países como Portugal, Francia, Serbia, Polonia, España, e cunha habilidade irrebatible: a de cultivar a festa máis vigorosa alá onde ve a base de música, humor, baile e desinhibición cerebral.

Compartiron varias veces escenario con artistas como Manu Chao Radio Bemba Sound System onde foron convidados a participar no evento Baionarena no ano 2008.

Con Emir Kusturica & the no Smoking Orchestra  onde ademais de telonear en varias ocasións, foron contratados para o Festival Kusstendorf en Serbia organizado polo mítico director de cinema. Fanfare Ciocarlia, Gogol Bordello, Dubioza Kolektive, Muchachito, Macaco, foron outros grupos cos que tiveron a oportunidade de compartir festa.

Todo comeza cando unha noite de lúa chea Emilio Ouro sofre unha transformación xenética e cerebral que o levou a converterse na Kabra Macabra. Despois de meses de andaina co seu carriño de música itinerante e moita vida social decide recrutar tropa para revolucionar o mundo dos pasarrúas en Galicia. A primeira formación do grupo quedou así integrada por Yuri Brinkas (cantante), Xiñor Tonichi (guitarra), Martín el Beizo (trompeta), Alex Díaz (saxo), Gustavo Agasi (caixa), Xurxo Troncoso (bombo), Manuel Lousas (violín) e Emilio Ouro (teclado), aos que logo se une Miguel Rumbao (baixo).

A formación estréase no Corpus de Ourense nunha noite regada con viño, na que ven no deber de repetir o repertorio tres veces. Comeza así a tocar nunha chea de festas e festivais e articula o seu primeiro show: Rumaníacos, a cerimonia do cultivo da sacra semente da festicultura que fai brotar o espírito festeiro polo mundo adiante. Logo veu o espectáculo As Kabras Chouteiras, que mestura sketch, música e humor .