Evento: Orquesta de Instrumentos Reciclados de Cateura

Toda historia ten un comezo, e esta ten o rostro dun violín atopado no lixo. Sucedeu en 2006. O escenario é o gran vertedoiro de Cateura, en Asunción, capital de Paraguai. Un lugar onde os residuos se converteron en parte da paisaxe e no medio de vida para moitas persoas que se dedican a recuperalos.

Fabio Chávez, músico paraguaio, tivo entón a idea de utilizar estes materiais co obxectivo de fabricar instrumentos e ensinar música aos nenos da zona. Así, e dunha maneira enxeñosa, comezaron a preparar guitarras, violíns, contrabaixos ou saxofóns. Vinte nenos, fillos dos traballadores do vertedoiro, comezaron a tocar os instrumentos e convertéronse nos pioneiros da orquestra, conseguindo facer realidade o seu soño.