Evento: Curtocircuíto 2017

Máis dunha ducia de profesionais e artistas internacionais, catro obradoiros, un seminario, cinco conferencias, unha performance, dous programas de películas que ilustran a importancia do son no cine, un concerto e unha exposición dotarán de contido á edición 2017 de Curtocircuito. Arredor do son é un conxunto de encontros interdisciplinarios que dialogan en torno ao concepto de son como forma de expresión e vía de coñecemento, organizado con apoio de Agadic Galicia ProFilme. O edificio Obra Social Abanca situado na praza de Cervantes aglutinará grande parte das actividades consolidándose como unha nova sede do festival compostelán.

Fronte á tradicional hexemonía da imaxe no mundo do cinema, Curtocircuíto quere poñer en valor o son como linguaxe e vehículo de expresión, non só no ámbito cinematográfico. Estes encontros abordarán aspectos como a paisaxe sonora, a gravación de campo, a etnografía, a inmersión sensorial e a sinestesia. Serán a principal novidade desta décimo cuarta edición do festival. Ademais da oferta formativa, tamén haberá instalacións artísticas e performances en espazos públicos na programación do evento.

David Toop, Juan Carlos Blancas ou Mateo Mena serán algúns dos nomes que formarán parte do programa.