Evento: Visita guiada polo Arquivo Histórico provincial de Ourense

Nesta xornada de Espazos Sonoros, como aperitivo ao concerto que terá lugar no Salón Nobre do Liceo de Ourense, terase a oportunidade de facer unha pequena visita guiada ao Arquivo Histórico Provincial. Alí poderase ver os orixinais manuscritos de dúas obras inéditas, da segunda metade do século XVIII, que foron recuperadas e transcritas por encargo do festival para seren interpretadas durante o posterior concerto. As obras foron compostas por Antonio Krause, un capelán de Bohemia (na actualidade, parte da República Checa), e consérvanse nun atado, de orixe descoñecida, xunto a diversas partituras e outros documentos.

Krause dicíase discípulo do mesmo Haydn, daquela o músico europeo de moda, o que entra dentro do plausible tendo en conta as datas nas que viviu e a súa procedencia. Así e todo, o máis interesante neste caso é que o arquivo conserva as dúas únicas copias, que se saiba, destas pezas, que foron anunciadas polo autor para a súa venda na Gaceta de Madrid. Ademais, farase unha visita xeral para coñecer o arquivo e farase fincapé nos elementos musicais que custodia.
 

Hora e lugar:  19.00 h, na sede do Arquivo Histórico Provincial de Ourense, rúa Hernán Cortés, n.º 2

Capacidade máxima: 40 persoas

Inscrición: do 30 de setembro ao 10 de outubro, en actividades@espazossonoros.org