Evento: Pablo Seoane

“Parábase” é unha peza en sete partes que atende ao curso desas relacións especulares e á converxencia dos xestos asimétricos, una especie de construción antifonal sobre a dificultade de concibir calquera identidade. Foi creada especificamente por Pablo Seoane para Espazos Sonoros e para os órganos da igrexa de San Salvador de Lourezá. “Parábase” está directamente inspirada na natureza xemelga dos instrumentos nos que será interpretada: dous exemplares únicos dentro da paisaxe organística galega que soarán conxuntamente, por vez primeira en moito tempo, nunha singular experiencia sonora.

A obra, que porá punto final en Espazos Sonoros á sexta xornada de roldas pola paisaxe organística galega, tenta explorar os recursos e as potencialidades expresivas destes dous instrumentos nos que aínda é posible apreciar a beleza, a nobreza e o porte do seu son, a pesar da inevitable pátina que neles deixou o paso do tempo.