Evento: Los inundados

A auga de Los inundados é auga de río, dun río cotián do litoral arxentino que é todo menos paisaxe estética, en cuxas costas viven varias familias de escasos recursos que deben trasladarse logo dunha crecida. Así, a auga e a natureza politízanse, non só pola neglixencia do goberno que se demora en construír un dique para conter a corrente senón porque rapidamente a inundación é capitalizada polos partidos políticos locais, que prometen melloras na calidade de vida dos santafesinos. Los inundados xorde do interese de Birri por mostrar –nun traballo que sintetiza a ficción con aspectos documentais– o que nunca se mostrou no cinema nacional: vidas reais, cheas de problemas e de problemas máis colectivos que individuais, pero non sen encanto e chamamé.