Evento: Más que abejas. Polinizadores y flores, la vida en juego

A biblioteca acolle esta exposición producida polo Museo de Ciencias Naturais de Barcelona.

Cunha formulación museográfica visual e pedagóxica que ofrece varios niveis de lectura en paralelo, a exposición explora o apaixonante mundo das abellas, un dos grupos de polinizadores máis importantes e, ao mesmo tempo, bastante descoñecido. A mostra é un escaparate da vida das abellas silvestres, pero tamén representa unha oportunidade para entender o papel que exercen estes insectos, xunto cos seus hóspedes, as plantas, no equilibrio ecolóxico do planeta. E é que a humanidade se enfronta a un problema inquietante, o declive das abellas, do que cada vez se fala máis e que o Museo de Ciencias Naturais non pode eludir. As causas son múltiples e están intimamente relacionadas coa longa cadea de alteracións do medio causadas pola actividade humana. Debemos ser conscientes dos danos que provocamos e trazar un guión de boas prácticas para recuperar a biodiversidade perdida.

A exposición está estruturada en dous grandes bloques. O primeiro, máis pedagóxico, expón de forma didáctica que é a polinización, os axentes implicados, a diversidade destes axentes, a importancia da polinización na alimentación humana, a crise dos polinizadores, as razóns do declive… O segundo bloque exponse como unha interacción co visitante para explicarlle que pode facer ante esta situación, empezando por plantar flores aromáticas, construír hoteis de insectos…, e para que entenda que non todo está perdido: aínda podemos endereitar o rumbo para que todo cambie.

A exposición tamén quere dar visibilidade ás iniciativas que se están levando a cabo en todo o mundo para dar a coñecer estes pequenos seres que realizan funcións esenciais para a estabilidade do planeta.

No vestíbulo. Pode visitarse no horario de apertura da biblioteca.