Teatro

A tripulanta RÍAS BAIXAS e o tripulante NORAI son dous científicos con dúas hipóteses para explicar a salinidade das augas do mar. Mentres NORAI cre máis nas teorías científicas, RÍAS BAIXAS pensa que é grazas a unha lenda cuxos protagonistas viviron nun lugar moi perto. Tras representaren a lenda da auga do mar, os dous tripulantes organizan unha grande expedición aos fondos mariños encontrándose con peixes xigantescos e facendo partícipes a toda a comitiva de grandes descubrimentos.

Atención! Esta contada está en obras. Sí: está sen acabar. Pero non vos preocupedes. Temos un andamio, tubos de antenista, unha guitarra eléctrica cun looper, unha batería cun capacho e un caldeiro, ferramentas... e a axuda do inestimable público. Malo será que entre todos non acabemos estes contos cheos de música e ritmo. Contos de osos tristes, de extraterrestres que viaxan en caldeiros de fregar, de cans de palleiro que se convirten en superstars… A nova tolería de Brais das Hortas. Contos, música, títeres, instrumentos con obxectos e moita interacción co público.

Aínda que nunca se afastou da costa máis dunha milla mar adentro Caxoto é un home de mar, cando menos filoxeneticamente. Bisneto, neto e fillo de armadores e mariñeiros, o mar corre polas súas veas e a súa memoria dende o mesmo momento de nacer.

Ao longo da súa traxectoria como narrador oral Caxoto foi atesourando un rico repertorio mariñeiro de contos, lendas, anécdotas e feitos históricos que agora decidiu enfiar neste espectáculo de narración oral. Un espectáculo para os cinco sentidos cheo de salitre, mar picada e vento zoando.

Espectáculo de nova creación, no formato de teatro itinerante e animación de rúa, ambientado na Europa do Leste de principios do Siglo XX.

Esta é a historia dun destista dos Cárpatos ambulante,  que percorre co seu carromato as vilas en busca de pacientes para a súa consulta;  a través de xiros inesperados da historia e utilizando diferentes técnicas ( clown , música en directo, maxia, títeres )  coñeceremos o seu curioso pasado, e descubriranos unha nova historia totalmente inesperada, cun final sorprendente.

Leti da Taberna trae o seu primeiro monólogo no que explora en ton irónico a nosa relación coas redes sociais e como nos inflúen no noso día a día. En galego e con perspectiva feminista, Enredadas enche o escenario de luz e enerxía, provocando que a espectadora se vexa identificada coas situacións que se presentan e acabe ríndose de si mesma.

 Xunto con algúns números de marionetas tradicionais no que os espectadores participan cantando e danzando, preséntanse o conto O Galo Quirico seguindo a versión publicada por Bernardino Graña. Unha posta en escena con marionetas e teatriño de cartón, formato de espectáculo recuperado pola compañía para esta ocasión e con música en directo, interpretada polo acordeonista Carlos Quintá.

Paleontoloxía é un ritual de invocación, unha homenaxe póstuma, un exercicio de memoria colectiva. A creadora achéganos a paisaxe da súa infancia e os clarescuros da súa orixe. Co mono de traballo posto, escarva nos ósos dos seus devanceiros e desenterra as raíces da súa poética. Asistimos neste espectáculo a un fermoso paseo por unha orografía familiar onde o home traballa na madeira, a muller escorbella verduras e a nena observa. Esta tríade invítanos a atravesar o limiar dun espazo atemporal onde todo é posible. Os avós poñen a lingua, a neta a palabra.

En Historias dun mundo grande a cadeliña Becki, desde a súa biblioteca onde pasa tanto tempo lendo e escribindo, cóntanos historias que foi coñecendo nas súas viaxes polo mundo. Historias de colaboración e de solidariedade entre as persoas. E con ela cantamos e bailamos para celebrar o respecto e a felicidade.

PREMIO DO PÚBLICO DE FESTICLOWN 2018.

ESPECTÁCULO MELLOR VALORADO NOS DOMINGOS PRINCIPAL 2018.

 Píscore son catro prestixiosos músicos fronte a un grande conflito: 16 baquetas e unha soa marimba. Catro músicos dispostos a facela soar do xeito máis orixinal e abraiante. Organizarse xa non vai ser tan doado. 

Corochas é un espectáculo de pequeno formato dirixido á primeira infancia, que combina a narración oral, a manipulación de obxectos e a música. A través do conto acumulativo, a canción ou o xogo de imitación viaxaremos por diversas paisaxes e coñeceremos a personaxes estrafalarias que deben resolver múltiples enredos. Por que será que existen tantos xeitos de chamarlle ás corochas? Será que a sensación en cada unha de nós é tan diferente que non somos quen de poñerlle un único nome? Ou será que as corochas só existen á beira do mar e as cóxegas no alto da montaña...