Pop/rock

MotherSeed nace en Vigo a finais de 2013 da unión de Susi (voz), Ángel (guitarra), Davis (baixo) e Raúl (batería). A unión dos catro cuns gustos e intereses musicais comúns fai que comecen a desenvolver o seu proxecto musical. Froito do traballo e inquedanzas comúns resultan finalistas no certame Música Xove organizado polo Concello de Santiago.

Os seu estilo musical pódese encadrar dentro do rock clásico dos anos 60's e 70's con influencias dos máis grandes do xénero como Led zeppelin, AC/DC, The Rolling Stones, The faces, ZZtop, The allman brothers, The who,...

THE CRIERS é un grupo de Rhythm & Blues nacido en San Jose, CA. con fortes raíces na música negra.
A formación liderada polo cantante e guitarrista Adrián Costa consegue dar unha volta de porca ao son dos 60's e recrearse nunha espiral de influencias. Desde o son de Nova Orleans ata os primeiros The Kinks, sen esquecer as súas reminiscencias latinas. Unha banda de gran carácter vocal sen reparo a mesturar equipos de válvulas con sintetizadores, unha banda de soul-rock cunha aloucada posta en escena.

Despois de diversos proxectos aferrados sempre ó mástil das súas guitarras, Óscar Lope e Valentín Dacova acaban formando DESCONCERTO. Versións atípicas mestúranse con clásicos de todos os tempos nun repertorio tan extenso como variopinto. 
Nos seus directos interactuar co público e pasalo ben son os dous obxectivos principais.

ITH son unha banda de rock en galego que toma o seu nome do fillo de Breogán. Aínda que residen en diferentes poboacións da provincia da Coruña, localizan o seu campamento base en Xanceda, no Concello de Mesía. Levan moitos anos facendo música en galego, e polo grupo levan pasado diferentes músicos e cantantes.
Actualmente a banda está formada por Miguel Iglesias (guitarra e coros), J.L. Toxo (guitarra), Gonzalo Suárez (baixo e coros), Miguel Folgueira (batería) e Lucía da Fonte (voz)

Santi (guitarra e voz), Koko (contrabaixo e berridos) e Dani (batería) son os compoñentes da banda de rockabilly e psycobilly de Marín.
A banda tivo orixe pola obsesión de Santy e Koko polas músicas que consideraban mortas: o rockabilly e o punk, a finais de 2005 dan forma sonora a estas obsesións con Toxic Patrol, un proxecto que máis tarde derivará no actual Breakin' Bones.

O músico, intérprete e compositor David Feito desenvolve a maior parte da súa carreira ata a data, como un dos membros da banda El Sueño de Morfeo.
 
En 2015, tras dez anos de éxitos coa súa banda, David emprende agora a súa carreira en solitario presentándonos o seu primeiro disco: En el otro lado. Nel, o músico asturiano quere ensinarnos o seu lado máis persoal con once cancións de marcado toque roquero que combinan os medios tempos con enérxicas composicións power-rock.

Los Pontiaks son unha banda viguesa de Rock & Roll formada por Andrelo Loud-Rider coa guitarra, Speed King na batería e Mister Cobra co contrabaixo.
Son un trío instrumental de tres individuos amantes desa cultura estadounidense dos coches Hot Rods e do rock and roll máis clásico.

Os Novos son unha banda compostelá de recente creación de punk con integrantes procedentes de Samesugas, Redullos e Madame Germen.
A pesar de ser recente xa teñen publicado un 10" titulado Nom lugar, que están a presentar nas súas actuacións acompañando xa de novos temas.

Igor Paskual é un artista completo: Escritor, compositor, guitarrista, licenciado en Historia da Arte, columnista en xornais e apaixoado do fútbol. Todo o que leva a palabra "cultura", pódese asociar con Igor Paskual. Presentando o seu novo disco, un disco de rock ecléctico e elegante, rotundo, sensible e heterodoxo "Tierra firme". Igor Paskual iniciouse musicalmente en Babylon Chat onde lle deu duro ao glam-rock.

Nacho Vegas non cesou na súa procura por camiños antes non transitados, xa sexa vía dos grupos nos que militou, nas colaboracións que xunto a outros artistas levaron a cabo (Migala, Mus, Aroah, Diabologum ou Corcobado), ou na relación natural que a súa música ten coa pantalla, tanto grande como pequena.
A finais de 2015 publicou un novo EP Canciones Populistas, na súa xira presenta os cinco temas que compoñen este último EP e o anterior LP, Resituación, publicado en 2014.