Espectáculo

“Canta miña pedra canta”, un espectáculo familiar dirixido a nenos e nenas de 5 a 12 anos que levarán adiante o músico Xoán Curiel e a contadora Charo Pita, baixo xestión da Editorial Galaxia. Xoán Curiel volve ao Falaredes acompañado nesta ocasión da narradora e contadora Charo Pita. A actividade vira ao redor dos relatos populares galegos e de cancións que don Antonio Fraguas, a quen este ano se lle dedica o Día das Letras Galegas, recolleu nas súas Aportacións ao Cancioneiro de Cotobade.

Ópera Break´s é un espectáculo que mestura Ópera, Breakdance, Beatbox e Dj nunha única función de gran calidade artística que brota da conexión da soprano Esperanza Mara e os artistas urbanos do colectivo Vella Escola. Contan unha historia a través da expresión musical e corporal. Rompen as barreiras do clásico e do urbano, fusionándose nun espectáculo multidisciplinar onde o inimaxinable pode suceder… Atréveste a liberar a túa mente de preconceptos?.

Papabuis comeza unha viaxe que é unha promesa familiar. Percorrer “O camiño de Santiago”. Nel vivirá catro aventuras nas que descubrirá as claves para atopar un tesouro agochado no mesmo corazón das persoas: a linguaxe universal a través da cal todas e todos podemos conectarnos e crecer como comunidade.

É a proposta de Pisando Ovos para espazos non convencionais na que música e movemento, desde os seus estados máis puros, atópanse a través do diálogo entre un DJ e unha bailarina.

Unha conversación baseada no darlle unha volta, no xiro continuo, na repetición e transformación do movemento e do son. Un encontro onde os corpos sopórtanse e resisten baixo a forma dun abrazo continuo.

Para a ocasión contamos coa colaboración especial do DJ Jas Processor.

A danza dos Paxaros é un espectáculo de animación de rúa que conta coa participación da compañía Can Cun Quiqué; As e os bailaríns interpretan a grandes e vistosos paxaros cabezudos baixo a dirección dun ornitólogo que acompaña a esta particular bandada no seu danzar. Acompañados da música, das súas vistosas vestimentas e sobre todo de moito humor e moito ritmo, os paxaros percorrerán as rúas, a praza ou o espazo que se lles dispoña sorprendendo a todos e todas as presentes.

O Paporrubio nace en Lalín no ano 2013 da man de Luchi Iglesias. A súa personalidade enredante e argalleira fixo que dende moi novo se interesase polas formas de diversión da xente, o que unido ao seu traballo de actor, titiriteiro e escenógrafo deu como resultado O Paporrubio. Este é un proxecto que xira ao redor dos xogos populares, sempre á procura da súa revitalización a través da inclusión de elementos teatrais, musicais e plásticos, pero que non esquece o que de lúdico e comunitario teñen de por si os xogos tradicionais.

Novos lobos é un espectáculo de narración oral e monicreques no que se toca o tema do xénero desde a perspectiva das novas masculinidades. Deconstrúense nel algúns contos da literatura popular para adaptalos a esta nova ollada, nunha tentativa de ofrecer ferramentas conceptuais ao alumnado que axuden a prever a violencia de xénero. O espazo no que sucede a acción é un pequeno refuxio da montaña no que un pastor está coidando das súas ovellas (o público).

Mamá Cabra é o grupo de música infantil pioneiro na produción de espectáculos musicais pensados para o público infantil. A súa historia remóntase ao ano 2000, e partiu primeiramente de facer cancións para as clases de Educación musical de Gloria Mosquera, principal fundadora do grupo. A primeira canción naceu na biblioteca do colexio no que estaba Gloria, despois de ler o poema do “Timoteo” de Gloria Sánchez que está no libro “Rimas con letra”. O seu primeiro disco é Cantos Rodados, de dez temas que se baseaban en poemas de autores como Antonio G.

Unha vez máis uniremos a música e o teatro para conmemorar, deste maneira, as Letras Galegas.

Nesta ocasión, ademais de homenaxear a Vitoria Moreno, tamén faremos un percorrido pola historia das Letras, lembrando a autores de anteriores edicións e por suposto, a razón pola que cada ano festexamos esta data. Todo isto co ton desenfadado e divertido que caracteriza ao noso proxecto. Cunha duración de 50 minutos aprox.

De ti e mailo mundo que apañes pretende ser un humilde percorrido pola obra da poeta, tradutora e editora Xela Arias, un percorrido que nada ten de cronolóxico pero moito de persoal, co que a nós se refire. Revoltas pola palabra achegámonos excitadas á súa obra, posuídas por esa escrita extrema que remove pel e ósos. Aparece entón a dúbida, o medo ao non estar á altura de semellante extremidade, a de Xela, a dos extremos. Pero nese xusto momento o poema tranquilízanos.