Lugo, 14 de outubro de 2024

A Delegación Territorial de Lugo acolleu hoxe a presentación do Esmorga Fest, que se celebrará en Sarria os días 25 e 26 de outubro e do que a Xunta é a principal patrocinadora.

Na presentación participaron o delegado territorial, Javier Arias, así como Jose Castro, Diego García e Juan Padín en nome da organización. Arias destacou “o pulo que está a experimentar o Esmorga Fest nos circuítos de música independente”, confirmando para esta novena edición a algúns dos artistas de máis proxección do panorama nacional e internacional.

Ourense, 14 de outubro de 2024

O xurado do Premio Otero Pedrayo, impulsado pola Xunta de Galicia e as catro deputacións provinciais, vén de fallar o galardón deste 2024 a favor da Coral de Ruada. Na xuntanza, na que participaron o secretario xeral da Lingua, Valentín García, e o director xeral de Cultura, Anxo M. Lorenzo, elixiron esta agrupación pola súa traxectoria de máis dun século levando a música tradicional galega a grandes festivais nacionais e internacionais e tamén polo seu labor na promoción de actividades de formación de teatro e da escola de música.

Santiago de Compostela, 14 de outubro de 2024.- A Xunta colabora coas celebracións do 150 aniversario do nacemento do arquitecto Antonio Palacios mediante un convenio co Concello do Porriño, terra natal do homenaxeado, polo que fai unha achega de 170.000 euros para o desenvolvemento das distintas actuacións programadas pola administración local, algunhas delas xa desenvolvidas nos últimos meses. Así se deu conta hoxe na reunión do Consello, na que se destacou a posta en marcha dunha sala de exposicións como principal proxecto no municipio.

Santiago de Compostela, 14 de outubro de 2024.- O Consello da Xunta deu hoxe luz verde ao convenio entre a Consellería de Cultura, Lingua e Xuventude e a Diocese de Lugo co que o Goberno autonómico impulsa a restauración dos danos estruturais que afectan á cuberta do inmoble. A igrexa do Carme, localizada xunto á Porta Miñá nos extramuros da muralla romana da cidade de Lugo, contará a través deste acordo cun investimento de máis de 140.000 euros.

Ferrol, 13 de outubro de 2024

A delegada territorial da Xunta en Ferrol, Martina Aneiros, asistiu esta tarde no teatro Jofre á Gala Internacional de Maxia Galicia Ilusiona.

Muíños (Ourense), 13 de outubro de 2024

A Xunta de Galicia vén de poñer en marcha esta semana as obras de consolidación no xacemento arqueolóxico e da mámoa da Veiga de Maus de Salas. Trátase dunha actuación que, cun importe de 35.000 €, busca recuperar e poñer en valor o patrimonio megalítico que se atopa no encoro do Salas.

Santiago de Compostela, 13 de outubro de 2024

A Xunta de Galicia lanza unha audioguía para dispositivos móbiles destinada a facer máis accesible a visita ás exposicións do Museo Gaiás, tamén para as persoas con dificultade auditiva, ao incorporar explicacións en lingua de signos. Esta app está dispoñible polo momento para a mostra Unha vida viquinga e inclúe tamén audio e texto en tres idiomas.

Santiago de Compostela, 12 de outubro de 2024

A Xunta de Galicia fomenta alternativas de lecer cultural para as familias con Zapaburu. Unha actividade que chega por primeira vez a Galicia na que a arte xa non se enfoca exclusivamente desde unha perspectiva didáctica, senón que se transforma nun espazo para experimentar con todos os sentidos as distintas pezas que compoñen a instalación. O seu obxectivo é estimular a creatividade na primeira infancia e facer dos museos un lugar accesible para os nenos e nenas.

Lugo, 11 de outubro de 2024

A Delegación Territorial da Xunta en Lugo acollerá esta fin de semana dous concertos de música coral no salón de actos. O delegado territorial, Javier Arias, participou hoxe na presentación do Concerto de Outono que reunirá o domingo 13, a partir das 19.30 horas, ao Coro do Hospital de Lugo e ao Coro Senior do Campus de Vigo.

Santiago de Compostela, 11 de outubro de 2024

A industria musical galega darase cita a semana que vén en Santiago de Compostela co gallo do cuarto encontro SiSons Enclave Musical, que conta co patrocinio da Xunta de Galicia para desenvolver un intenso programa de actividades profesionais e de concertos, aberto tamén ao público xeral de xeito gratuíto.