Rede galega de música ao vivo

Filloas é un artista de pop urbano en galego, que trae unha música coa que non pararás de bailar e moverte. 

A música de Filloas é un reflexo das súas propias experiencias e os seus sentimentos máis profundos, e sempre buscando un sorriso e intentando transmitir unha mensaxe positiva. 

Entre ritmos punk pop e trap, atopamos audaces referencias á cultura de internet, aos videoxogos e á Galicia máis contemporánea. As súas letras amosan reflexións persoais, abordando temáticas xeracionais, a saúde mental, as relacións persoais e a festa. 

PAVA é a proposta musical da poeta e compositora coruñesa Lucía Aldao. Un directo pegadizo que vai da psicodelia ao pop rock máis alternativo con tintes de crúas guitarras velvetianas. Nos traballos discográficos de Aldao sobrevoan as sombras de xigantes como PJ Harvey. A personalidade da súa voz e a forza das súas letras orbitan na elipse das novas voces femininas xurdidas do outro lado do Atlántico. En PAVA, sen dúbida, “Canta unha poeta oral”.

Rosa Cedrón presenta Nómade, un caderno de bitácora que describe as luces e sombras percorridas nunha travesía cara ao máis profundo da identidade propia.

Gravado en casa de Tolos coa produción de Segundo Grandío e o selo inconfundible de Sergio Moure de Oteyza, Nómade é o terceiro traballo en solitario da artista que, acompañada das súas xa incondicionais Javier Cedrón e Miguel Arthus, bríndanos o resultado dunha viaxe sonora que parte da escuridade das tempestades á serenidade do albor que fortalece, aliviando as feridas pasadas e sanando as presentes.

“The Show Moscón” é un circo ambulante de “varietés”, presentado por un moscón gordiño. Un marabilloso circo, representado por un armario que abre as súas portas para mostrar os diferentes números que se haxan no seu interior. Nace como homenaxe ás diferentes escolas e técnicas de manipulación, aprendidas ao longo destes anos e utilizadas nos seus distintos traballos de teatro e televisión, así como, a través da inspiración do traballo doutras compañías de teatro e circo como: Hugo & Ines, GaiaTeatro, Cia O retrete de Dorian Grey, Jordi Bertran Company ou Meigo Lioz Shem,

Concerto a cargo de LMTB.

Límbico é un proxecto persoal do guitarrista e compositor Iago Marta. Unha banda instrumental que funciona como vehículo das ideas e preocupacións musicais do seu creador, tentando aglutinar as numerosas e variadas influencias ás que estivo exposto na súa traxectoria como intérprete. Partindo dunha visión jazzística da interpretación, as composicións oscilan entre os arranxos obrigados e a liberdade para os solistas, incorporando linguaxes estilísticas diversas propias do folque, da enerxía do rock ou da improvisación libre.

Concerto Leticia Rey en formato trío a voz, guitarra, piano e baixo

Leticia Rey é unha das claras promesas da música galega, tras gañar o Premio Estudios Mans da Fundación Paideia decidiu apostar en firme pola súa carreira musical

Concerto de Leticia Rey xunto ao excepcional pionista Iago Mouriño presentando o disco LuX, grabado en directo, e temas inéditos e algunha versión.

Un concerto moi recomendable para ciclos de música intimista con unha voz que sorprende a calquera que a escoita por primeira vez.

Ju Young e Martín Otero coñécense nos Países Baixos estudando jazz no Conservatorium van Amsterdam. Ambos comezan a actuar xuntos en diversas agrupacións ata que posteriormente forman un dúo co que seguirán actuando en cidades como Ámsterdam e Leiden. Nesta formación exploran as posibilidades dun repertorio jazzístico cun enfoque máis intimista e persoal, dando espazo a outros estilos musicais e, por suposto, a composicións orixinais.

Elephants Yard tamén ofrece un traballo de base, levando a música Reggae ás pequenas salas e escenarios ofertando un show de versións clásicas do Reggae. A amplitude do repertorio permite ofrecer unha sesión de covers de calquera estilo jamaicano, desde ritmos mais oldies (Ska, Rockstrady, Calypso), clásicos do Reggae 70´s ou un show mais moderno centrado no Rub-A-Dub (Rap Xamaicano), Early Dancehall e RaggaeMuffin.

As composicións deste quinteto nacen da necesidade de expresión a través da música propia do líder da formación, Diego Alonso, habitual das escenas galegas e portuguesas. A meirande parte das obras son de creación xenuína do músico, alén de composicións doutros membros da banda. Partindo de diversas abordaxes rítmicas, tímbricas, texturais e estilísticas, foméntase a voz individual de cada un dos membros, situando así á banda no eido do jazz contemporáneo.