Rede galega de música ao vivo

Bibidibabidibú! é un espectáculo cómico de improvisación teatral protagonizado por Sheyla Fariña, Susana Sampedro e Marta Doviro, tres fadas Teimas que empregan a súa maxia para cumprir os desexos do público.

As persoas asistentes escribirán os seus desexos e introduciranos no «caldeiro das fadas». Ao longo do espectáculo, as Teimas escollerán algúns ao azar e representaranos no escenario de maneira totalmente improvisada e en clave de humor. Unha hora de impro, catro xogos e moita participación do público para lanzar os desexos ao universo… aínda que se cumpran ou non!

Xan Pérez e Carlos Quintá unen as súas experiencias nun novo proxecto de música para o baile, a diversión e a festa. Tomando como punto de partida a música popular da tradición oral, elixen espirse, liberándose de sons pregravados e de propostas escénicas pretenciosas, nun exercicio esencialista, no que o acordeón diatónico, a voz e as percusións móstranse preparados para facer do campo da festa un momento de participación para o público.

Todo está en equilibrio. O Home, ás veces non.

Como Rafael Dante.

O seu desequilibrio aseméllase ao de calquera outro.

Pero o seu equilibrio non.

Dun lado da balanza a técnica, a precisión, a concentración.

Do outro lado o disparate, a gargallada, o imprevisto.

A partes iguais, en equilibrio...

Como o humor co respecto.

Como o artista sobre os seus obxectos.

Como o noso ADN na súa estrutura,

ou como o de calquera verdura...

CHERRY SWEET é unha banda de swing composta por tres vocalistas e tres instrumentistas que repasan sobre o escenario o repertorio clásico do xénero dun xeito divertido e contaxioso.

A formación, que comezou a súa andaina en 2015, é hoxe un referente deste estilo na escena galega, tendo participado en eventos como o Festival de Jazz de Noia, As noites brancas de Vigo, ou o Monforte Fusión.

Un concerto diferente que fai ao publico bailar e gozar desde o primeiro minuto.

Baseada en feitos reais, esta é a historia de Antonia “A Lirina” veciña de Olivenza. Sucede na fronteira estremeña con Portugal, entre Olivenza e Badaxoz, durante os anos 1942 e 1964. Un retrinco vivo das historias do contrabando en España, protagonizado por unha muller forte, intelixente, socarrona e astuta que pelexou por manter a súa dignidade e o seu dereito de traballo nun mundo profundamente machista.

Maraya Zydeco é das poucas bandas europeas que traballan o xénero do Zydeco, Cajun, etc... Segue a provocar gran espectación escoitar un acordeón interpretando esas músicas posto que na escena galega este instrumento está lóxicamente moi vinculado ao tradicional.

Blues e soul froito da unión de músicos dalgunhas das mellores bandas galegas do xénero: Javi Gradín á guitarra, harmónica e voz, Lucas Ferrández á batería, Fon Botana ao baixo, Álex Salgueiro ao piano hammond e David “Tato” Vázquez á guitarra. Xuntos fan música vibrante e poderosa, nun sabio repaso por grandes temas do blues. 

The Blues Moonshiners é un trio de blues que se xesta en 2018 e no que se mesturan o blues rural, o country-blues e a música folk de raíz afroamericana dos 30, 40 e 50. Proxecto formado polo guitarrista e cantante Jay Doe acompañado do armonicista Ramón Figueira e o percusionista Fran Rilli. A súa música defínese como blues envellecido de destilación ilegal, de aí o seu nome Moonshiners que fai referencia aos destiladores de whisky ilegal na América profunda.

Sanny é unha cantautora viguesa que acompañada pola súa guitarra e harmónica, percorreu xa escenarios de distintos puntos da xeografía nacional, así como Portugal, Inglaterra e Italia. As súas influencias veñen principalmente de artistas de folk e rock norteamericano como Bob Dylan, Joan Báez, ou Neil Young entre outrxs, de quenes aprende a importancia e responsabilidade de empregar a música como ferramenta social. Tamén teñen nela unha gran influencia compositoras indie contemporáneas como Phoebe Bridgers, Sharon van Etten ou Angie McMahon.

Esta nova banda, formada por voz, guitarra acústica, contrabaixo e batería, revisa co seu estilo persoal os clásicos de swing dos anos 20 a 40. Tres son as claves desta formación: a voz de Paula Martins, no estilo das lendarias cantantes de jazz como Billie Holliday, o estilo New Orleans, que o guitarrista Manu mistura co do seu ídolo, Django Reindhart, e o SWING, que fai que a música de Manu New Orleans Band, ademáis de para escoitar, sexa sobre de todo para bailar.