Este ano, a Real Academia Galega dedícalle o 17 de maio a sete pandeireteiras e, con elas, a todas as mulleres que crearon e transmitiron a música tradicional, e a lingua, de xeración en xeración. A Rede de Dinamización Lingüística súmase a esta homenaxe con esta e outras actividades.
O FalaRedes 2025 ábrese con narración oral (a cargo de Vero Rilo) e música (a cargo de Luís Iglesias) para os máis pequenos da casa e trasládanos ao ano 2735. Pelica de Burra viaxa no tempo e chega a un futuro sen xogos, sen música… así que decide regresar ao pasado para recoller as palabras perdidas e devolverllas a un porvir que será, sen dúbida, moito máis luminoso. Pelica de Burra ofréceselles aos concellos da Rede de Dinamización Lingüística en dous posibles formatos: obradoiro para bebés (0-3 anos) en grupos reducidos ou espectáculo familiar.
FalaRedes leva obradoiros de banda deseñada a 25 destinos diferentes, cunha nova proposta de dinamización do uso da lingua galega.
Os obradoiros dirixidos á infancia, mocidade ou público adulto, segundo as preferencias do concello anfitrión, van achegarlles a todas as persoas que participen os elementos da linguaxe narrativa visual do cómic. Nun ambiente de traballo ameno, apoiado ademais con proxección de materiais visuais, unha nova forma de narrar nacerá das nosas mans.
Quen vai impartir os obradoiros:
FalaRedes trae no tempo do outono unha proposta dirixida a toda a familia na que combinamos o teatro de monicreques coa música, para que nun contexto distendido e alegre os nenos e as nenas poidan gozar de novas experiencias en galego.
Carlos, Pili, Loli, Braulio, Sonia e Tatá, xunto co seu can Chispa, deciden construír un escenario musical despois de atopar unha caixa chea de instrumentos musicais para ofrecer un gran concerto. A medida que as melodías do tambor, a guitarra, o piano ou a frauta soan, aprenden os diferentes estilos musicais e compoñen as súas propias cancións.
O programa de dinamización do galego FalaRedes chega ao tempo do outono cunha pequena xira do espectáculo teatral Wombo Combo da compañía Galeatro.
Esta obra escrita por Paula Carballeira, Premio Nacional de Literatura Dramática en 2023, está dirixida á mocidade, ao público xeral a partir de 8 anos. Nunha reflexión sobre as vidas virtuais e a soidade na adolescencia contemplamos como o bo ou mal uso das redes sociais, presentes na nosa vida cotiá, dá en levarnos a un desenvolvemento persoal óptimo ou á frustración e o illamento.
Uxía, Germán Díaz e Sèrgio Tannus únense nun espectáculo musical que pretende mostrar toda a beleza das músicas -históricas e imaxinadas- da tradición musical dos Camiños a Santiago.
As actividades do programa de dinamización do uso da lingua galega FalaRedes continúan cos obradoiros de rap, breakdance e estampado de camisetas. Co galego sempre como lingua vehicular, a mocidade (e quen sexa maior tamén, por suposto) gozará da aprendizaxe das expresións artísticas e deportivas da cultura urbana do máis alto nivel.
Calendario
"Cantigaéverso" é o título deste proxecto musical no que Francisco Castro e Federico Welicki repasan e revisitan os clásicos da poesía galega musicada.
María Faltri, tamén vocalista da Banda das Apertas de Magín Blanco, chega agora cun espectáculo orixinal e sorprendente: unha picadiscos de música infantil. Durante o seu espectáculo María brindaralle aos cativos e cativas unha escolla da mellor música infantil galega para que non deixen de xogar e bailar. Tamén para que aprendan as cancións da man dos libros da súa pequena biblioteca ambulante.
A exposición Orgullo da nosa lingua: o galego é un tesouro para compartir chegará en maio e xuño a catro entidades da Rede de Dinamización Lingüística: Boiro, Cambados, Ribadeo e Betanzos.
A mostra consta de 9 paneis que percorren particularidades do galego co fin de mostrar o seu valor e a súa riqueza, alimentar o sentimento de pertenza e convidar a cidadanía a falalo. A exposición poderá visitarse por libre ou ben coa guía dunha persoa dinamizadora que atenderá os asistentes en horario establecido por cada concello.
