Concerto

Cantante, compositora, presentadora e activista LGTBIQ+, Rocío Saiz leva anos vinculada á industria musical como colaboradora de Radio 3, programadora en festivais —Primavera Sound, Low festival, SXSW, Summercase, etc.—, como axente doutros artistas e tamén cos seus propios proxectos persoais (Las Chillers, Monterrosa). O seu álbum debut en solitario (Amor Amargo, 2021) é un percorrido emocional cargado de enerxía pop e acompasado cun lirismo contemporáneo que reborda empatía.

Un proxecto a medio camiño entre unha banda e un grupo de produtores, nacido en Vigo en 2019 froito da reconversión do grupo de noise rock Jay. Samplers, hip hop e ritmos urbanos dan forma ás paisaxes instrumentais que son a base sobre as que Mundo Prestigio constrúe os seus temas en colaboración con artistas da escena contemporánea galega como Boyanka Kostova, Grande Amore, Ortiga ou Mariagrep.

Banda compostelana que leva desde 2017 traendo aos escenarios o mellor soul dos anos 60 e 70. Formada por músicos cunha dilatada traxectoria no jazz, o blues e o swing, Carla Green & The Demons inclúe no se repertorio temas de grandes clásicos como Etta James, Otis Redding ou Wilson Pickett, e composicións propias nas que se achegan tamén aos ritmos do soul e o funk latino. Gañadores do premio Martín Códax 2020 dentro da categoría blues/funk/soul.

Coñecida pola súa faceta como actriz nas series Buscando el norte, Hierro ou Campamento Albanta, a canaria debuta na música en 2020 cun EP que tamén formou parte da banda sonora doutra serie de éxito: Élite. A longo de 2022, Kimberley Tell está a debullar os temas do seu segundo traballo, Error 404, no que mantén a súa aposta polas melodías limpas e letras que falan do íntimo, dando forma a un indie pop rico en influencias.

María Jorge (violín), Anaïs Barbier (voz e pandeireta) e Pedro Fariñas (guitarra e gaita) forman Caldo, un trío afincado no Valmiñor que achega a música tradicional a contextos sonoros contemporáneos a través da experimentación cos propios instrumentos. Cun formato puramente acústico, a súa proposta integra melodías tradicionais galegas e composicións propias con influencias das músicas europeas e atlánticas, unha fusión natural que vai directa ao sentir do público.

A voz e a guitarra da cantautora de Arzúa beben de diferentes estilos, do rock-pop nos seus primeiros traballos aos sons latinos e a música de raíz do seu último disco A luz prendida. Catro álbums, máis de 200 concertos en Galicia e Portugal e un rebulir creativo que levaron a MJ Pérez incluso a xuntar as dúas Rosalías, a poeta galega e a artista catalá, na súa versión «Malaxente».

Cantaor flamenco de voz pura, grande potencia e sensibilidade que lle permiten adaptarse aos matices que requiren os diferentes paus do flamenco. Fillo de artistas e neto de “El Tito” tamén cantaor, Alfredo Tejada é un todoterreo do oficio que percorreu os principais festivais, tablaos, peñas e teatros só ou na compañía de grandes figuras como La Lupi, Mario Maya, Fuensanta 'La Moneta' ou Rocío Molina , entre outras. Gañador do 57º Festival Internacional del Cante de las Minas e Mellor cantaor de acompañamento no Festival de Jerez 2020.

Sila Lúa, con raíces viguesas, combina a música urbana en español e a electrónica experimental. Afincada en Madrid tras pasar unha bota tempada en Londres, onde descubriu novas formas de facer música, estilos e mesturas innovadoras, publica este ano o seu álbum de debut, pero xa de seguro que a escoitaches na cuarta tempada da serie Élite en Netflix, onde soan os seus temas «Nada» e «Quiero llorar».

Do Land Rober ao Got Talent, de festival en festival, Los Jinetes del Trópico levan a súa fusión de ritmos latinos, ska e música popular galega aló onde faga falta. O autodenominado FestiZaxe dos de Monforte leva desde o ano 2015 sacando a bailar á xente en salas e festivais de toda Galicia, gravando temas sen parar —ata unha Cumbia de Muxía coas Tanxugueiras— e agora o trío sube ao Gaiás para montar unha verbena irrepetible ao solpor.

Os BellRays son unha forza da natureza procedente de Riverside, California. Coñecidos en todo o mundo polo seu son punk, rock e soul, que é único e non ten comparación. Desafían continuamente unha definición singular e están orgullosos diso. Os BellRays fan boa música e así é como lles gusta.