A sexta edición de Cultura no Camiño desenvolverase do 16 de abril ao 30 de setembro nun total de 103 concellos situados nas diferentes rutas xacobeas de Galicia.
O programa xurdido ao abeiro da conmemoración do VIII Centenario da Peregrinación de San Francisco de Asís a Compostela desprega unha carteleira de 342 actuacións escénicas e musicais, protagonizadas por 146 formacións artísticas galegas. Artículase como un circuíto de espectáculos que ademais de contribuír á descentralización da oferta cultural, amplía as posibilidades de distribución do teatro, a música, a danza, a maxia e o novo circo producidos de maneira profesional na nosa Comunidade.
“Encantamentos a Cor” é un espectáculo de maxia, humor e participación do público, que percorre todo o espectro óptico das fantasías e ilusións.
A través dos sentidos viaxaremos pola e coa imaxinación, nun espectáculo con sorpresas apoiadas en todo tipo de trebellos, adobado todo cun guión cargado de intres inesperados e imprevisíbeis.
Espectáculo para experimentar sensacións fascinantes, cheo de gargalladas, colaboración da concorrencia, moita luz e claridade.
Carta de Ajuste nace por accidente no ano 2010 como un proxecto baseado no versionado de grandes éxitos da música pop-rock en español dos anos 80 e 90 en formato acústico.
Os seus insensatos compoñentes, influenciados por agrupacións musicais de corte cómico como Les Luthiers, Académica Palanca ou Los Gandules entre outros, pouco a pouco imprimirán no seu espectáculo un carácter máis teatral, humorístico e desenfadado que os levará a adaptar no seu repertorio todo tipo de xéneros musicais, dende a rumba ou a música disco ata o funk, a música tradicional ou a lambada.
CALDO son María Jorge (violín), Anaïs Barbier (voz pandeireta) e Pedro Fariñas (guitarra), que presentan unha proposta de melodías tradicionais galegas integradas en novos contextos sonoros, xunto a pezas propias tinguidas das músicas europeas e atlánticas.
Creado con agarimo, CALDO resulta un prato musical delicioso, no que os ingredientes viven unha fusión natural que vai directa ao sentir do público.
Un amago de atleta polipatético se verá involucrado en multitude de problemas para lograr a ansiada medalla olímpica. A cerimonia de apertura remata sendo un desastre, tenta acadar o éxito nos deportes máis coñecidose o único que logra é o fracaso máis absoluto.
Logrará acadar a ansiada medalla?
Clown, mimo, pantomima e slapstick mestúranse neste tolo espectáculo no que o seu protagonista sae dun problema para entrar noutro e para rematar coa vitoria máis ridícula xamáis vista na historia.
Elenco: David Merelas
Durante milleiros de anos, os alquimistas, nómades con grandes coñecementos nas matemáticas, na física, na química, na astroloxía e incluso no ocultismo, viaxaron cos seus laboratorios ambulantes por todos os lugares do mundo cun obxectivo concreto. Ese obxectivo era atopar a Pedra Filosofal.
O soño dos alquimistas era dominar a natureza , o lume, e finalmente o tempo.
A fraga do meu avó está chea de carballos que case tocan o ceo, castaños, bidueiros, loureiros, bieiteiros, abeleiras, e moitas árbores que sempre deron moitísimo mais que madeira. Agochados entre eles andan paxaros como a pega marza, o mito, o peto real, a estreliña do norte, o paporroibo real, a curuxa,…
E percorrendo os seus camiños están a píntega, os esquíos, o xabaril, o raposo,…
Mari Gésta, é un personaxe inspirado en Mary Poppins. AS súas estravagancias fan rir ás crianzas, mais tamén ás maiores. Vive no monte, adora os toxos e as xestas e posúe unha maxia especial que a leva a sacar cousas máxicas da súa sacola. Un espectáculo a medio camiño entre o musical e o contacontos, tinguido de seres marabillosos que acompaña a esta peculiar muller.
Elenco: Cristina Collazo
Cantante-animadora: Laura de Gabriel
Músicos: Sergio Rodríguez, Diego Roca, Fernando Moure, Jorge Muñoz, Diego Martínez
Esta banda de música infantil recolle os clásicos populares galegos dándolles o seu toque particular, desde A Carolina “rapeada” ata O Jato “rockeiro”,…pasando por outros moitos temas tradicionais, todos eles moi dinámicos, facendo que todos os nenos e nenas presentes sexan partícipes deste “des-concerto”, cheo de bailes, xogos, coreografías e algunha que outra sorpresa!
Logo do seu primeiro disco LET'S MAKE A CHANGE, Susana oferta un repertorio no seu segundo traballo discográfico con cancións que seguen na súa liña de pop bailable misturado con soul e funk.
Temas que nos lembran ó estilo de Norah Jones, Michael Jackson..., combinados con cancións folk-pop en galego e outras de pop americano.
Ritmos bailables e tamén melódicos que se adaptan perfectamente a un formato acústico
Ante a situación que nos toca vivir neste ano 2020, a compañía mago Teto creamos o espectáculo “ Unha noite no Castelo” para realizar en espazos en exterior nos que sexa fácil controlar o aforo de público e cumprir cos protocolos de seguridade. Con este espectáculo intentamos levar as nosas maxias a espacios do patrimonio cultural que apenas se usan para as artes escénicas ( castelos, claustros,..)
