Ao longo dos catro días do festival, haberá espectáculos de animación e jam session en distintos espazos, obradoiros para públicos infantís e xuvenís, saídas, feira turístico-gastronómica e, como evento principal, a gala do sábado, na que se entregarán os Premios Rebulir da Cultura Galega 2018, e que contará coa participación de Carlos Blanco, Guadi Galego e Romaría Raigame, coa presentación de Ce Orquestra Pantasma.
Festival de rock en beneficio dos nenos necesitados da cidade de Vigo. Nesta edición o cartel inclúe nomes como The Liar Papers, Terader, You Dog! ou Strikeback.
Segunda edición do festival, que contará con nomes como Mamá Ladilla, Dagla, Playa Desmayo, Faro - Heavy Rock, Turbo Kraks ou Tequila Road Rock & Blues Band.
Festival organizado polo Colectivo Terra, que nesta edición estará centrado na loita obreira dos estaleiros da ría de Ferrol. Contará coas actuacións de Bule, un grupo eumés que mistura o pop e o rock con melodías divertidas e apegadizas; Tanxugueiras, unha auténtica homenaxe á música tradicional galega; Bastards on Parade, que presentan novo disco e que fusionan as raíces celtas co punk rock; e The Baboon Show, unhas criaturas salvaxes chegadas dende Suecia cun punk rock escandaloso baixo o brazo.
OUFF é un dos acontecementos máis destacados en Galicia na súa especialidade, un festival que converte a cidade das Burgas nunha gran sala de cine na que o público pode gozar de producións cinematográficas non estreadas nos circuítos, de ciclos centrados en actores, directores e cinematografías de prestixio internacional que abrangue numerosas nacionalidades, ao tempo que se erixe como un punto de encontro anual para os profesionais do sector en Galicia.
A primeira edición da Semana de cine submarino de Vigo remóntase a 1985. No ano 2018 alcanza a súa 28ª edición convertida nun referente da imaxe submarina. Neste longo percorrido, desde os océanos máis profundos, a biodiversidade das rías galegas ou as augas continentais, foron moitas as temáticas tratadas nos documentais proxectados, todas elas relacionadas co mundo submarino e a biodiversidade acuática.
Como en ocasións anteriores, a Semana de cine submarino amosará os mellores traballos audiovisuais internacionais e volverá estrear producións galegas.
Do 2 ao 4 de novembro terá lugar a quinta edición do encontro Vigo es flamenco, que ten por obxectivo divulgar o flamenco no norte de España.
Nesta edición participarán o bailaor El Junco, o percusionista Roberto Jaén, o cantaor Mati e o guitarrista Óscar Lago. Ademais, haberá obradoiros especiais e clases específicas con persoeiros do mundo flamenco.
Para realizar reservas pódese chamar ao teléfono 615 557 270 ou escribir ao email encuentroflamencovigo@gmail.com
Cinema Crianza é un festival internacional de cine infantil e familiar que se celebra en Ames, o concello con maior porcentaxe de poboación infantil de Galicia.
Cinema Crianza nace co afán de promover o gusto polo cinema entre os máis cativos, así como axudar a formar un público futuro con sensibilidade artística, interese cultural e espírito crítico ante o consumo audiovisual.
Do 30 de novembro ao 2 de decembro celébrase en Pontevedra a cita anual da cultura feita en Galicia. Culturgal, que chega a súa décimo primeira edición, enche todo o recinto do Pazo da Cultura de Pontevedra de expositores e actividades. Unha cita ideal para coñecer todo o que virá en libro, cine ou música e, por que non, para adiantar as compras dos presentes do Nadal. Máis de 80 stands e máis de 120 actividades durante os 3 días de Feira congregan anualmente a preto de 15.000 persoas en Pontevedra.
Sexta edición deste evento realizado en Cabreiros, localidade do concello lucense de Xermade. O ciclo desenvólvese durante os meses do outono. A programación inclúe proxeccións de longas e curtas, tanto de documental coma de ficción; contacontos e teatro. Cada xornada terá quenda de preguntas e debate, tras a proxección ou espectáculo.
20 de outubro: inauguración e proxección de Pedrón do Freixo
3 de novembro: contacontos O apalpador
17 de novembro: obra de teatro Unha escola en branco e negro
