A Xunta de Galicia conmemora o Día da Ilustración 2025 cun amplo de abano de actividades nas bibliotecas de xestión autonómica sobre o legado de Xosé Vizoso, artista que se homenaxea este ano.
Trátase dunha programación que estará presente nas bibliotecas xestionadas pola Xunta de Galicia e en escolas de arte e na que destaca a mostra bibliográfica "Xosé Vizoso. O neno que debuxou un cabalo " na Biblioteca de Galicia, na Cidade da Cultura. Estará dispoñible do 30 de xaneiro ao 12 de maio. A programación está composta por unha exposición, un vídeo, obradoiros, sesións de narración oral ou mostras bibliográficas sobre a traxectoria deste artista natural de Mondoñedo.
Con esta serie de iniciativas, a Xunta de Galicia quere render unha homenaxe a Xosé Vizoso, un artista gráfico que, alén dunha ampla traxectoria como deseñador e ceramista, ten tamén unha importante produción como cartelista, muralista e ilustrador de libros. O recoñecemento ao autor de Mondoñedo é o primeiro que se fai en vida, xa que en anteriores edicións a efeméride centrouse en reivindicar a referentes históricos e pioneiros nesta disciplina.
